Tá an Pop Up Gaeltacht, a reáchtáladh den chéad uair mí na Samhna seo caite, ag dul ó neart go neart agus os cionn 40 imeacht éagsúla curtha ar siúl ar fud na hÉireann agus níos faide i gcéin ó chruinnigh cainteoirí Gaeilge le chéile don chéad ‘Pop Up’ sa teach tábhairne Rua i mBaile Átha Cliath.
Ó shin i leith, d’eagraigh bunaitheoirí an Pop Up Peadar Ó Caomhánaigh agus Osgur Ó Ciardha seacht gcinn d’ócáidí i gcathair Bhaile Átha Cliath, bhí trí cinn i mBéal Feirste, trí cinn i gCeatharlach, trí cinn i gCorcaigh, ceann amháin i nGaillimh, i dTír Chonaill, i Liatroim, i dTamhlacht agus i bhFine Gall i dtuaisceart Chontae Átha Cliath.
Chomh maith leis sin, reáchtáladh tuairim is 20 Pop Up taobh amuigh den tír seo in áiteanna ar nós Nua-Eabhrac, Perth na hAstráile, Hong Cong, Dubai, Toronto, Kansas agus Vermont.
Measann duine de bunaitheoirí an Pop Up, Peadar Ó Caomhánaigh, go bhfuil na mílte duine tar éis freastail ar Pop Up Gaeltacht faoin am seo. Dúirt sé le Tuairisc.ie go raibh an slua is mó go dtí seo i láthair ag an Pop Up a bhí ar siúl i roinnt tithe tábhairne éagsúla ar Lána an Dáma i mBaile Átha Cliath an oíche roimh Lá Fhéile Pádraig — bhí idir 900 agus 1,000 duine i láthair ar an oíche sin, dar le Ó Caomhánaigh.
Leanann tuairim is 3,500 duine an Pop Up Gaeltacht ar na meáin shóisialta agus léiríonn na hócáidí Facebook de na himeachtaí i mBaile Átha Cliath gur léirigh os cionn 1,500 duine spéis sna hócáidí éagsúla go dtí seo, cé nach féidir brath ar fhigiúirí ócáidí Facebook le measúnú cruinn a dhéanamh ar an bhfreastal.
Tá coincheap an Pop Up tar éis scaipeadh do theangacha eile, freisin. Go dtí seo bhí a leagan féin den Pop Up Gaeltacht ag lucht labhartha na Gàidhlig in Albain, ag cainteoirí Manainnise in Oileán Mhanann agus ag Coirniseoirí i gCorn na Breataine.
Tá leaganacha eile den choincheap ag teacht chun cinn in Éirinn freisin agus an múnla céanna á úsáid le daoine a mhealladh chuig imeachtaí Gaeilge eile. Is é bunaidhm an Pop Up Gaeltacht a tosaíodh ag deireadh na bliana seo caite áit a chruthú do chainteoirí Gaeilge ar féidir leo dul ag ól agus ag labhairt na Gaeilge.
Tá ‘Pop Up Gaeltacht na nÓg’ bunaithe ar an múnla céanna, is é sin go bhfógraítear láthair ar na meáin shóisialta agus bítear ag súil le slua, ach in áit oíche ragairne i dteach tábhairne, bailíonn tuismitheoirí agus gasúir óga le chéile i bpáirc nó láthair dá leithéid le haghaidh lá spraoi.
Tá imeachtaí eile ar nós ‘Pop Up Gaeltacht Shláintiúil’ curtha ar bun ag an gcomhlacht Aclaí i gCorcaigh freisin do dhaoine ar mhaith leo seisiún aclaíochta a dhéanamh in éineacht le cainteoirí Gaeilge eile.
Tá ócáid eile dhá lá, atá bunaithe ar an Pop Up Gaeltacht, ar siúl i gContae an Chabháin inniu. Bhailigh 60 déagóir ó cheann ceann na tíre i gCaisleán Saunderson inné don imeacht shóisialta seo.
Mánus
Nach íontach iad na Pop uppers. Dá mbeadh cúpla comharchumann tithíochta LánGhaeilge ag poppáil suas timpeall bhailte mhóra na tíre bheadh brí eile leis an focal “Gaeltacht”.