Mórghradam idirnáisiúnta buaite ag dráma TG4 Grace Harte

Tá mórghradam idirnáisiúnta cumarsáide de chuid Prix CIRCOM buaite ag an dráma Gaeilge Grace Harte, a craoladh ar TG4 anuraidh.

Thug an dráma, an chéad duais leis sa rannóg ‘Dráma agus Siamsaíocht’ a raibh 223 saothar istigh uirthi.

Is comórtas bliantúil é Prix CIRCOM a thugann aitheantas do na cláracha teilifíse is fearr a craoladh ar na craoltóirí seirbhíse poiblí san Eoraip.

Tá an stáisiún Gaeilge ar cheann de 10 gcainéal a mbronnfar duais orthu i mbliana. I measc na mbuaiteoirí eile, tá dhá chainéal teilifíse san Iorua, NRK Nordland agus NRK Hordaland, dhá chainéal de chuid na Danmhairge, TV/Midt-Vest agus TV2 Fyn, SVT Öst na Sualainne, an BBC agus cainéal de chuid Phoblacht na Seice.

Dúirt David Lowen, Uachtarán Prix CIRCOM gur léirigh “ardchaighdeán” na n-iontrálacha go bhfuil na meáin seirbhíse poiblí “breá bisiúil”.

“Tuigfidh duine ar bith a fhéachann ar na cláir seo agus a thuigeann an scil a bhaineann lena ndéanamh go bhfuil na meáin seirbhíse poiblí breá bisiúil ar an teilifís, ar líne agus ar na meáin shóisialta,” a dúirt sé.

I mbliana, bhí cead ag gach stáisiún dhá iontráil a chur chun tosaigh agus cuireadh béim i mbeagnach gach catagóir ar chur chuige il-ardáin na gclár agus ar dheiseanna an lucht féachana a tharraingt isteach.

Dúirt Ard-Stiúrthóir TG4, Alan Esslemont gur léiriú é Grace Harte ar ‘Súil eile’ TG4.

“Léiríonn sé an méid is féidir a bhaint amach nuair a thugtar daoine cumasacha le chéile le lucht maoinithe uaillmhianacha chun drámaíocht den chéad scoth a dhéanamh. Sin é tús agus deireadh ‘Súil Eile’ TG4,” ar sé.

Ba é Antoine Ó Flatharta a scríobh Grace Harte, scéinséir a taifeadadh i ndubh agus bán, faoi dhúnmharú in iarthar na hÉireann. Charlie McCarthy a stiúir Martha O’Neill a léirigh do Wildfire Films, comhlacht léiriúcháin atá lonnaithe i mBaile Átha Cliath.

Ba iad Kate Nic Chonaonaigh, Dara Devaney agus Eoghan Ó Dubhghaill na príomhaisteoirí ann.

Bronnfar na gradaim Prix CIRCOM ag searmanas speisialta i Leeuwarden na hÍsiltíre, Déardaoin an 24 Bealtaine.

Tá Grace Harte ar fáil arís ar sheinnteoir TG4 ag an nasc seo.