MIONLÉIRMHEAS: I measc na bplód gan ainm . . .

I measc na bplód gan ainm,

Gan ‘Cé dhár díobh é?’ ar a mbéal
Ná fios mo shloinne acu . . .

Baineann línte cáiliúla sin an Direánaigh le duine ar bith a bhraith uaigneas na cathrach agus is é sin go díreach atá sa leabhar seo. An cumha is an t-uaigneas a bhíonn ar dhaoine áirithe i gcathracha strainséartha.

Is cinnte gur bhraith go leor Gael an t-uaigneas céanna i gcathracha Shasana, na Stát Aontaithe, na hAstráile agus áiteanna eile nach iad. Agus le déanaí, chuir an phaindéim le líon na ndaoine ar fud an domhain ar bhuail uaigneas is stoiteachas iad, gan trácht ar theifigh is daoine gan dídean.

Aithnítear go coitianta anois gurb é galar an chaipitleachais atá sa stoiteachas, is é sin le rá nuair a thugtar tús áite don tomhaltas, don bhrabús agus don mhargadh, bíonn an duine bocht fágtha in áit na leathphingine, ag streachailt leis an uaigneas.

Thug a cheamara sólás éigin don ghrianghrafadóir, Bob Farese, Jr., agus é ag déileáil leis an gcumha a bhí air i gcathair strainséartha.

Faoi bhláth

Is deacair domhan a shamhlú gan bláthanna ann. Is deacair sochraid a shamhlú gan bhláthfhleasc agus cén saghas bainise a bheadh ann mura mbeadh pósae ag an mbrídeach?

Tá áiteanna in Éirinn atá gann ar bhláthanna. An ndéanann sé sin difríocht ar bith do mheon na ndaoine sna bólaí sin? Tá ábhar staidéir ansin.

Sa bhliain 1983 a foilsíodh an leabhar seo ar dtús. Bhí an-éileamh air ag an am, ní nach ionadh. Ba trí sheans – mar a tharlaíonn go minic – a cruthaíodh an leabhar seo. Bhí ord is eagar á chur ag Meyerowitz ar dhornán grianghraf nuair a thug sé faoi deara go raibh bláthanna iontu go léir. Chuir sé sin ar chonair na mbláthanna é.