Manchán Magan ag iarraidh go léireofaí ‘tuiscint’ dó i dtaobh ráitis a rinne sé faoi chás na Gaeilge

Tá iarrtha ag Manchán Magan, atá ag seasamh don Chomhaontas Glas san olltoghchán i Longfort-An Iarmhí, go léireofaí ‘tuiscint’ dó mar gur ‘ionadaí nua’ é.

Bhí Magan ag tagairt ar Twitter don chaint atá tarraingthe ag ráiteas a rinne sé inné faoi ról an stáit i gcur chun cinn na Gaeilge.

Dúirt an láithreoir teilifíse agus scríbhneoir taistil inné nár cheart go mbeadh ról ar bith ag rialtas ó thaobh na Gaeilge de.

@aonghusoha@OisinOhAlmhain@greenparty_ie@tuairiscnuacht Braithim go gcaithfidh daoine a bheith tuiscneach le ionadaí nua do mo leithéid.

— Manchán Magan (@ManchanMagan) January 14, 2016

Dúirt Magan inné gur shíl sé go mba chóir do dhuine ar bith ar mhian leis an Ghaeilge a fhoghlaim nó a labhairt é sin a dhéanamh, ach nár chóir go mbeadh ról ar bith ag rialtas i gcúrsaí Gaeilge agus nár chóir go gcuirfí brú ar dhuine ar bith í a úsáid ná a fhoghlaim. I ráiteas a thug an Comhaontas Glas do Tuairisc.ie inniu, dúradh gur “tuairim phearsanta” a bhí sa mhéid sin. Dúirt urlabhraí ón gComhaontas Glas nach ionann sa chás seo tuairim a n-iarrthóra agus tuairim an pháirtí agus iad ag coinneáil amach ó thuairimíocht Mhagan. “Bhí tuairim phearsanta á cur in iúl aige agus creidim go raibh sé ag iarraidh béim a leagan ar an tábhacht atá le rannpháirtíocht an phobail in athbheochan na Gaeilge. “Níl aon athrú ar sheasamh an pháirtí i leith na Gaeilge, aithnímid tábhacht thacaíocht an stáit don teanga agus táimid ag leanúint d’fhorbairt an dátheangachais sa Chomhaontas Glas féin trínár gCairt Teanga, 2014-2016,” a dúirt urlabhraí ón gComhaontas Glas. Dúirt an t-urlabhraí gurb iad baill an pháirtí féin a toghann “go daonlathach” céard iad na polasaithe a bhíonn ag an gComhaontas Glas. Dúirt iarrthóir eile de chuid an pháirtí Oisín Ó hAlmhain inniu gurb í a thuiscint siúd ar an scéal ná go gcaithfí “cead speisialta a fháil ó choiste bainistíochta an pháirtí” sa chás go mbeadh iarrthóir chun easaontú go poiblí le polasaithe oifigiúla an pháirtí.

@aonghusoha @greenparty_ie @ManchanMagan @tuairiscnuacht bíonn orthu cead spesialta a fháil ó choiste bainistíocht an pháirtí — Oisín Ó hAlmhain (@OisinOhAlmhain) January 14, 2016

Tá Oisín Ó hAlmhain ag seasamh don Chomhaontas Glas i mBaile Átha Cliath Lár Theas.