‘It would be preferable to send it in an internationally recognized language’ – freagra an Royal Mail faoi litir a seoladh i nGaeilge

Tá gearán oifigiúil á dhéanamh ag Conradh na Gaeilge leis an Royal Mail mar gheall ar an chaoi ar pléadh le litir a raibh an seoladh scríofa i nGaeilge uirthi.

Toisc an seoladh a bheith i nGaeilge, thóg sé breis agus dhá mhí ar litir, a sheol an Roinn Oideachais chuig Seán Ó hEacháin, múinteoir Gaeilge i gColáiste Feirste, a ceann scríbe a bhaint amach. Tá an Roinn Oideachais lonnaithe i lár chathair Bhéal Feirste agus tá cónaí ar Ó hEacháin in iarthar na cathrach.

Nuair a tháinig an litir chuige ar deireadh, chuir Ó hEacháin pictiúr den chlúdach ar na meáin shóisialta agus tharraing sé aird ar a raibh scríofa air ag lucht an Royal Mail. Bhí na focail ‘not known’ scríofa ar an seoladh i nGaeilge agus aistriúchán go Béarla déanta air.

Bunaitheantas á shéanadh orm mar Ghael i mo chathair féin. I mo mhúinteoir le blianta is ní raibh fadhb leis seo riamh. Seoladh i nGaeilge agus “Not known” scríofa – ní thuigeann oibrí poist cód poist is uimhir tí??? @dreamdearg @CnaG @RoyalMail pic.twitter.com/ifIyX73u87

— Sean O hEachain (@heachain) 25 Meán Fómhair 2018

D’ardaigh Pádraig Ó Tiarnaigh, Feidhmeannach Cumarsáide, Cosaint Teanga agus Ionadaíochta le Conradh na Gaeilge an cheist leis an Royal Mail ar Twitter ansin.

Mar fhreagra ar a ghearán, thug urlabhraí de chuid an Royal Mail le fios gur “fearr” litir a sheoladh “i dteanga na tíre ónar seoladh í nó i dteanga a aithnítear go hidirnáisiúnta”.

Hi, apologies for the confusion. Preferably in the language of the dispatching country or in an internationally recognized language. For more information I would advise contacting the address management team via addressmaintenance@royalmail.com or by calling 08456 011110. >Mayah

— Royal Mail Help (@RoyalMailHelp) 26 Meán Fómhair 2018

Ag labhairt dó le Tuairisc.ie, dúirt Pádraig Ó Tiarnaigh nach raibh “aon leithscéal” ag an Royal Mail gan an litir a bhí i gceist a sheoladh go ceann scríbe in am réasúnta, go háirithe nuair a bhí cód poist agus uimhir an tí ar an chlúdach litreach.

“Níl a fhios agam an mbaineann sé le fear an phoist nó le cur chuige an Royal Mail ach ní raibh an litir tugtha ar aghaidh mar ba chóir,” arsa Ó Tiarnaigh.

Dheimhnigh sé do Tuairisc.ie go raibh sé i gceist ag Conradh na Gaeilge gearán oifigiúil a dhéanamh leis an Royal Mail chun léargas a fháil ar pholasaí na heagraíochta i leith na Gaeilge.

“An buaireamh atá ann go bhfeicfidh daoine nach mbaineann litreacha nó pacáistí a gceann scríbe amach má scríobhtar an seoladh i nGaeilge agus go gcaillfidh siad dóchas gur fiú é a dhéanamh agus go n-iompóidh siad ar an Bhéarla.

“Sa Bhreatain Bheag, tá dualgas ar an Royal Mail a bheith ag plé le seoltaí sa Bhreatnais faoi Acht na Breatnaise. Tá leagan den suíomh sa Bhreatnais agus cuirtear foirmeacha ar fáil sa teanga sin,” ar sé. 

Dúirt Ó Tiarnaigh gur léiriú eile atá sa chás seo ar an ghá le “treoir shoiléir ón rialtas agus reachtaíocht don Ghaeilge”.