Grúpa Gaeilge a phéinteáil ’35,000’ ar ‘aghaidh’ John Redmond ag Banc na hÉireann

Tá ráite ag an ngrúpa Gaeilge ‘Misneach’ gur bhaill dá gcuid a loit le péint an íomhá mhór chonspóideach de John Redmond ag Faiche an Choláiste i mBaile Átha Cliath.

Scríobhadh i bpéint dhubh aréir an figiúr ’35,000’ ar éadan Redmond san íomhá. I bpostáil ar na meáin shóisialta inniu, dúirt lucht Misneach gur léiriú an figiúr sin ar líon na nÉireannach a “seoladh chun báis” le linn an Chogaidh Mhóir. Mhol Redmond d’Éireannaigh dul chun troda ar thaobh na Breataine sa chogadh sin.

Bhain conspóid mhór le crochadh na n-íomhánna de phearsana stairiúla atá le feiceáil le cúpla seachtain anuas ar Bhanc na hÉireann. Ba iad Comhairle Cathrach Bhaile Átha Cliath a chroch na híomhánna de Redmond, Henry Grattan, Daniel O’Connell agus Charles Stewart Parnell mar chuid de Chomóradh 1916.

Rinneadh cáineadh ar an taispeántas toisc gan aon bhaint dhíreach a bheith ag na daoine sin le hÉirí Amach na Cásca agus go háirithe toisc gur dhamnaigh Redmond an tÉirí Amach i ndiaidh na réabhlóide.

Dúirt urlabhraí ó Misneach go raibh an ceart ag an staraí Diarmuid Ferriter gur “unhistorical shite” a bhí sa chinneadh na híomhánna a chrochadh.

“Níl aon dabht ann faoin meon a bhí taobh thiar den mheirge lochtach ar Fhaiche an Choláiste. Is iarracht é laghdú ar luach a dhéanamh ar ár stair réabhlóideach. Teastaíonn uaidh an stát comhchéim a thabhairt do náisiúnaigh bunreachtúla coiméadacha a bhí glan i gcoinne pholaitíocht fhorásach lucht an Éirí Amach.

“Ní raibh triúr de na figiúirí ar an meirge fiú beo ag am an Éirí Amach agus bhí Redmond glan ina gcoinne. Ní hamháin sin ach sheas Redmond i gcoinne na réabhlóidithe i go leor bealaí eile. Bhí sé i gcoinne vótaí do mná, i gcoinne na gceardchumann agus i gcoinne pinsean a thabhairt do sheandaoine. I bhfocail staraí amháin le déanaí is “unhistorical shite” é an meirge,” a dúirt an t-urlabhraí.

Rinne an grúpa céanna iarracht le déanaí íomhá Redmond a chlúdach le cóip mhór d’Fhorógra na Cásca ach nár éirigh leis an iarracht sin. Taifeadadh físeán den eachtra sin.

Ar a leathanach Facebook, deir Misneach gur “grúpa Gaeilge Pobalda” iad atá ar son “athghabháil na Gaeilge” agus gurb é an príomhchuspóir atá acu ná pobal muiníneach Gaelach a thógáil.

Tá graifítí déanta ag an ngrúpa i gCathair na Gaillimhe freisin.

Ag Ard-Fheis Chonradh na Gaeilge i mbliana glacadh le rún go n-aithneodh an Conradh “an obair mhaith atá ar siúl ag an ngrúpa Misneach i mBaile Átha Cliath” agus go mbeadh Conradh na Gaeilge “ag súil le bheith ag obair as lámha a chéile [le Misneach] i gcónaí”.

Dúirt Ard-Rúnaí Chonradh na Gaeilge, Julian de Spáinn, le Tuairisc.ie ar maidin nach mbeadh aon ghlacadh ag an eagraíocht le gníomh na hoíche aréir.

“Mar a deir sé sa rún a ritheadh ag an Ard-Fheis, is í an dea-obair atá ar siúl acu [Misneach] a mholaimid agus is é sin an dea-obair ar son na Gaeilge amháin,” a dúirt de Spáinn.

Dúirt urlabhraí ón nGarda Síochána gur damáiste coiriúil a bhí i gceist le graifítí ar bith agus go gcaitear “go dáiríre” lena leithéid. Níor éirigh le Tuairisc.ie teacht ar urlabhraí ó Chomhairle Cathrach Bhaile Átha Cliath.