Deir baill Choiste Oireachtais na Gaeilge go bhfuil siad “an-mhíshásta” nár fhreastail Aire Sinsearach na Gaeltachta ach ar chruinniú amháin dá gcuid le breis is dhá bhliain anuas, in ainneoin go ndearna siad teagmháil léi 11 uair le cuirí a thabhairt di.
I ráiteas a chuir Tithe an Oireachtais amach tráthnóna inné, rinneadh cur síos ar na hiarrachtaí go léir a rinne Coiste Oireachtais na Gaeilge an tAire Catherine Martin a fháil le teacht os a gcomhair.
Deir baill an Choiste gur údar iontais dóibh nach raibh an tAire Martin le fáil le teacht os a gcomhair ach uair amháin ó sheol siad cuireadh chuici den chéad uair ag deireadh na bliana 2020.
Idir seo agus sin d’fhreastail an tAire Martin ar chruinniú amháin den choiste, ar an 21 Bealtaine 2021.
Le linn na tréimhse idir Nollaig 2020 agus Samhain 2022, deir an Coiste go ndearna siad teagmháil 11 uair leis an aire, idir chuirí agus mheabhrúcháin, faoi theacht ina láthair.
Cé go bhfuil na dualgais ó thaobh na Gaeltachta aistrithe ag an Aire Martin go dtí aire stáit ina Roinn (Patrick O’Donovan agus Jack Chambers roimhe sin), deir baill an choiste gur chóir don aire sinsearach teacht os a gcomhair chun ceisteanna áirithe a fhreagairt.
Deir siad gur ar an aire sinsearach atá an phríomhfhreagracht as buiséad na Roinne agus gur mhaith leo ceisteanna buiséid a phlé léi, buiséad TG4 san áireamh.
“Is nós parlaiminteach seanbhunaithe é go dtagann Airí sinsearacha os comhair Choistí éagsúla de Thithe an Oireachtais go rialta. Sa chomhthéacs parlaiminteach sin, tá an Comhchoiste ag iarraidh ábhair atá tábhachtach do phobal na Gaeilge a phlé leis an Aire sinsearach a bhfuil an phríomhfhreagracht i leith na Gaeilge agus phobal na Gaeilge faoina cúram,” a deir an ráiteas ó Thithe an Oireachtais.
“Cuireann sé iontas ar an gComhchoiste nach bhfuil an tAire toilteanach obair an Chomhchoiste a éascú, díreach mar a dhéanann airí sinsearacha eile i leith Coistí ábhartha eile de chuid Thithe an Oireachtais.”
Tá ráite ag an Aire Turasóireachta, Cultúir, Ealaíon, Gaeltachta, Spóirt agus Meán, an Teachta Dála Catherine Martin, cheana go bhfuil dualgais na Gaeilge agus na Gaeltachta tarmligthe aici chuig aire stáit, ach deir Cathaoirleach an choiste, Aengus Ó Snodaigh, go bhfuil sé tábhachtach go dtiocfadh sí os a gcomhair.
Dúirt urlabhraí Gaeilge Shinn Féin cheana go mbíonn an tAire Martin ag maíomh go minic faoin obair a dhéanann sí ar son na Gaeilge agus gur uirthi atá an fhreagracht maidir le cinntí a dhéantar ina Roinn.
Pól
Bhí na laethanta ann gurbh ann do Roinn na Gaeltachta. Níl tábhacht a dhóthain le cúrsaí na Gaeilge nó le cúrsaí na Gaeltachta níos mó mar atá glinn glan soiléir len aireachtáil ag madaí na sráide ag éisteacht leis an scéal sin.
Airím thar a bheith díomách, caithfidh mé a rá.