Craolfar clár faisnéise anocht faoin amhránaí, scríbhneoir, scannánóir agus Feirsteach aitheanta.
Ba dhuine de mhórphearsana ceoil Bhéal Feirste é David Hammond, a bhásaigh deich mbliana ó shin, agus inseofar a scéal ag 9.30pm anocht ar Hammond: Duais an Dorais ar TG4.
Tugtar léargas sa chlár, ar comhléiriú de chuid BBC Gaeilge agus TG4 é, ar an lorg a d’fhág Hammond ar shaol an cheoil agus na n-ealaíon.
Is é Neil Martin, ceoltóir agus dlúthchara le Hammond, láithreoir an chláir agus cuirtear faoi agallamh ann ealaíontóirí agus ceoltóirí a raibh tionchar ag Hammond orthu, ina measc Dónal Lunny, Mairéad Ní Dhomhnaill agus Cathal Goan.
Ba stiúrthóir scannáin cumasach é Hammond freisin agus taispeánfar míreanna le linn an chláir de chuid den saothar a rinne sé agus é ag obair leis an BBC, ina measc The Magic Fiddle, Dusty Bluebells agus Sarah Makem.
Ba chara mór é David Hammond leis an mhórfhile Séamus Heaney agus déanann Mick Heaney, mac an fhile, cur síos sa chlár ar an chairdeas a bhí idir an bheirt.
Ag labhairt dó le Tuairisc.ie dúirt Neil Martin gurbh fhear ar leith David Hammond “a shaibhrigh saol an cheoil agus a chuir go mór le saol a chairde”.
Déanann Neil Martin féin cur síos sa chlár ar an chuairt dheireanach a thug sé ar David Hammond roimh bhás dó. Bhronn Hammond ceithre leabhar air an uair sin a raibh na céadta amhrán traidisiúnta iontu a bhailigh Sam Henry go luath sa 20ú haois i gCúige Uladh.
“Is cartlann an-luachmhar na leabhair de na hamhráin áitiúla a bhí coinnithe ag Davey agus é ag iarraidh go gcaomhnófaí iad do na glúnta amach romhainn.
“Bhronn Davey a lán rudaí ar a lán daoine lena bheo, ach ba é seo ‘duais an dorais’ a bhronn sé ormsa,” arsa Neil Martin.
Fág freagra ar 'Clár faisnéise le craoladh anocht ar TG4 faoin gceoltóir aitheanta as Béal Feirste David Hammond'