Má tá beatha ar bith i ndán don Ghaeilge caithfidh muid leaganacha nua-aimseartha cainte a chumadh. Na cinn atá againn faoi láthair baineann siad leis an am a raibh daoine ‘seal ag tarraingt fheamainne, ag cur fhataí agus ag baint fhéir’.
Tá na Meiriceánaigh cumasach ag cumadh leaganacha nua i mBéarla. ‘This is where the rubber meets the road,’ a deir siad. Ciallaíonn sé sin go bhfuil an teoiric go maith ach go gcaithfear í a chur i bhfeidhm anois.
Tá tús curtha agam féin le bailiúchán de leaganacha nua i nGaeilge. Iarrfaidh mé deontas ar Fhoras na Gaeilge agus éileoidh mé ardú táille ar Tuairisc.ie.
Seo cuid de na seoda atá curtha le chéile agam go dtí seo:
*Chomh buan le tuairim Trump.
*Chomh driseogach le Michael O’Leary.
*Chomh luaineach le polaiteoir aimsir thoghcháin.
*Chomh sleamhain le hoifigeach caidreamh poiblí.
*Chomh santach le creach-chiste.
*Chomh cinnte is atá caipín ar Mhaidhcil Healy Rae.
*Chomh claonta le tráchtaire ar Fox News.
*Chomh glórach le tvuít.
*Chomh dearmadach le Garda ag clárú coireanna.
*Ní hiad fir mhóra na hIodáile a itheann an spaigeití ar fad.
*Feicfidh mé aríst thú mar a dúirt Trump leis an Little Rocket Man.
*Mian gach mná gach ní daor i Debenhams agus i mBrown Thomas.
*Margadh maith é margadh Aldi.
*Scéal nach bhfuil i dtéacs ná i ríomhphost.
*Más maith teas na tine leictreach is fearr teas an duvet
*Glór nach binn gogallach cóisir cearc i mBarra an Teampaill.
Síle Ní Chathasaigh
Tá síad sin ar fheabhas! Lean ar aghaidh níos mó a chur le chéile!
Antain Mac Lochlainn
Fíormhaith. Ceann a chuala mé le gairid: ‘Chomh gann le huisce coisricthe i Lóiste Oráisteach.’
Padraig Ó Gallachoir
sean -fhocail núa chumtha a rinne mé fhein blianta ó shin :’ Ní lá na gaoithe lá na h-umbrellas’.
‘Is fada an bothar nach bhfui ciorcalán ann’. ‘Níl aon olc sa tsaol nach fearr dón Cigire Canach’.
‘Bá lé deontais a rinneadh na caisleain’. ‘Is olc an chearc nach bhfaigheann pinsin dithe fhéin’.