Ceist Ardteiste fúthu féin ar cheoltóirí as Gaoth Dobhair

Bhí na freagra sa scrúdú cluastuisceana ar eolas acu sular chuala siad an téip

Cathal Banjo

Baineadh geit as roinnt de na daltaí a bhí i mbun na hArdteiste i bPobalscoil Ghaoth Dobhair, Co Dhún na nGall an tseachtain seo nuair a thug siad faoi deara go raibh ceist fúthu féin le freagairt ar an bpáipéar Gaeilge. 

Baill den ghrúpa ceoil An Crann Óg iad Cathal Ó Curráin nó Cathal Banjo mar a thugtar go coitianta air agus Eimhear Nic Comhail agus bhí ceisteanna faoin ngrúpa ceoil i gcuid C den scrúdú cluastuisceana.

“Shíl mé go raibh sé greannmhar,” a dúirt Cathal Ó Curráin in agallamh ar Bharrscéalta ar RTÉ Raidió na Gaeltachta inniu.

“Bhí mé i mo shuí sa choirnéal agus thiontaigh achan duine thart agus bhí siad ag rá ‘sin sibhse’, bhí mé lag ag gáirí!” a dúirt an ceoltóir ildánach.

Bhain na ceisteanna le tacaíochta airgid a cheadaigh Aire Stáit na Gaeltachta don ghrúpa, an campa samhraidh a d’eagraigh siad sa mbliain 2007 agus dlúthdhiosca agus físeáin a sheol siad sa bhliain 2015. 

“Bhí a fhios agam na freagraí sular tháinig siad amach ar an téip,” a dúirt Cathal Ó Curráin a thug le fios go raibh súil aige aghaidh a thabhairt ar Ollscoil Luimnigh an bhliain seo chugainn le staidéar a dhéanamh ar chúrsaí ceoil agus Gaeilge.

Ach roimhe sin, tá 3 cinn de pháipéir le tabhairt fúthu aige an tseachtain seo chugainn agus samhradh gnóthach ag casadh ceoil.

Tá An Crann Óg le breis agus seachtain a chaitheamh i Nua-Eabhrac agus tá turas ceolmhar ar an Ghearmáin beartaithe acu le linn saoire an tsamhraidh.

Seo mar a labhair Cathal Ó Curráin le Séamus Mac Géidigh ar Bharrscéalta inniu:

Fág freagra ar 'Ceist Ardteiste fúthu féin ar cheoltóirí as Gaoth Dobhair'