Céimeanna oinigh le bronnadh ar bheirt de mhórchraoltóirí na Gaeilge

Bronnfaidh Ollscoil na hÉireann, Gaillimh céimeanna oinigh an mhí seo ar bheirt de mhórchraoltóirí na Gaeilge, Cathal Goan agus Breandán Feiritéar.

Beidh an bheirt chraoltóirí i measc 11 duine a dhein gaisce i réimsí éagsúla a mbronnfar céim oinigh orthu ag searmanais bronnta céimeanna an gheimhridh san ollscoil.

Bhí Cathal Goan, craoltóir iriseoir agus eagarthóir as Béal Feirste, ina cheannasaí bunaidh ar TG4 agus iar-ardstiúrthóir ar RTÉ chomh maith é.

Bhí Breandán Feiritéar, as Dún Chaoin i nGaeltacht Chorca Dhuibhne, ar fhoireann bhunaithe Raidió na Gaeltachta i 1972 agus thug sé tréimhse ina cheannaire ar an stáisiún ina dhiaidh sin. Tá cáil air chomh maith mar léiritheoir cláracha teilifíse agus scannán.

Ar na daoine eile a bhronnfar céimeanna oinigh orthu tá Séamus O’Grady, iar-oideachasóir; Shelly McNamara agus Yvonne Farrell, stiúrthóirí Grafton Architechts; Orla Guerin comhfhreagraí idirnáisiúnta  leis an BBC; Mary Gordon, uachtarán Roots of Empathy; Paul Farrell, bainisteoir le IBM; Nuala Ward, gníomhaí LGBT+; Fergus Finlay, iar-phríómhfheidhmeannach ar Barnardos; agus John Ging, stiúrthóir rannáin sna Náisiúin Aontaithe.

Dúirt Uachtarán OÉ Gaillimh, an tOllamh Ciarán Ó hÓgartaigh go raibh “an t-ádh” le Ollscoil na hÉireann, Gaillimh céimithe oinigh den scoth a bheith aici ach gur cinnte gur “grúpa ar leith iad céimithe oinigh na bliana seo”.

“Tá a c(h)ion féin déanta ag gach céimí oinigh daoibh i réimsí éagsúla maidir le hoideachas aosach agus leanúnach; cearta leanaí, iriseoireacht agus craoltóireacht; fiontraíocht shóisialta idirnáisiúnta; taighde, forbairt agus nuálaíocht; gníomhaíochas don athrú sóisialta; cion don tsochaí, cearta an duine agus ár bhFórsaí Cosanta.

“Is cúis áthais dúinn anseo in OÉ Gaillimh an deis a bheith againn aitheantas a thabhairt do na daoine den scoth seo.”