Céard is fiú do Letitia James, Ard-Aighne Stát Nua-Eabhrac a bheith ag cur an dlí ar Donald Trump agus ar a chlann as cúbláil airgid agus caimiléireacht? Ar éigean a bhí an dúch triomaithe ar an gcáipéis 300 leathanach a d’fhoilsigh sí ar an gCéadaoin ag cur síos ar na líomhaintí ar fad in aghaidh theaghlach Trump nuair a thosaigh tráchtairí ag míniú dúinn ar fad gur dóigh go ndéanfaí réiteach sa gcás agus nach dtiocfadh sé os comhair cúirte go deo.
Ar ndóigh, d’fhéadfadh sin a bheith amhlaidh ach níl cúrsaí chomh simplí sin. Ach an oiread le beagnach chuile shórt eile a bhaineann le Donald Trump agus a chuid gníomhartha tá go leor den pholaitíocht fite fuaite leis an scéal seo. Tá sé curtha i leith Letitia James ag Trump go bhfuil géarleanúint á déanamh aici air féin agus a chlann. Ní féidir sin a chur as an áireamh ar fad. Tá sé tugtha le fios ag Ard-Aighne Nua-Eabhrac le fada an lá gur mhian léi Trump a chniogadh mar gheall ar a chuid cleachtas gnó. Tá fadhb eile aici – cé go bhfuil an tuairim forleathan nach bhfuil cúrsaí gnó Trump iontaofa, tá go leor eile sa saol gnó a d’admhódh nach bhfuil siad féin gan locht. Dá réir, bheadh sé deacair aon chás coiriúil a thabhairt ina aghaidh. Nuair a chaitheann tú a chruthú nach bhfuil aon amhras réasúnach faoi chiontú, tá sé deacair aon chiontú a shamhlú.
Tá cáipéis mhór théagartha ag cur síos ar na líomhaintí ina aghaidh foilsithe anois. Cuirfear faoi bhráid na n-údarás coireachta na líomhaintí freisin. Ní dhéanfaidh an saothar aon dochar do chlú Letitia James ach an éireoidh léi aon rud a bhaint amach?
Ní chuirfidh an cor is déanaí seo i scéal Trump tada as dó fad a bhaineann sé leis an dream a chreideann ann. Chomh luath agus a foilsíodh an phróis Dé Céadaoin chuaigh sé i mbun stocaireachta ar a lucht leanúna ag iarraidh airgid leis na cúiseanna a throid. Seasfaidh an lucht leanúna dílis sin leis ar ais nó ar éigean. Creideann siadsan go bhfuil géarleanúint ar bun.
An rud a gcaithfear faire amach dó anois an mbeidh tionchar ag an scéal seo ar na toghcháin lár téarma faoi cheann sé seachtaine. An gcuirfidh sé dlús le tacaíocht na n-iarrthóirí a bhfuil Trump ag tabhairt a chuid tacaíochta dóibh? Is iondúil gur reifreann faoin uachtarán a bhíonn sa toghchán lár téarma sna Stáit Aontaithe. A bhuíochas do bhreithiúnas na Cúirte Uachtaraí faoi Roe v Wade agus beagán téarnaimh eacnamaíochta níl an cás chomh dona ag Joe Biden agus na Daonlathaigh agus a bhí cúpla mí ó shin. Reifreann, mar sin, ar an iar-uachtarán atá ag brath ar sheasamh in athuair don Teach Bán?
Beidh ainm Trump lárnach sa bpróiseas polaitiúil sna Stát Aontaithe nó go dtiocfaidh fógra uaidh bealach amháin nó bealach eile faoin toghchán in 2024. Tá an chosúlacht ar na Poblachtánaigh go bhfuil siad sa tóir ar mhalairt iarrthóra. Idir chás Nua-Eabhrac agus Mar-a-Lago tuigeann siad go bhfuil an oiread duáilcí agus atá suáilcí ag baint le Trump. Inseoidh na toghcháin ar an 8 Samhain an chuid eile den scéal dóibh.
Fág freagra ar 'Céard is fiú do Letitia James an dlí a chur ar Donald Trump?'