Tá eolas nua ar fáil faoi céard iad na coláistí samhraidh is mó a mheallann daltaí agus tacaíocht stáit dá réir.
De réir anailíse atá déanta ag Tuairisc.ie ar na figiúirí nua ó Roinn na Gaeltachta, coláistí Gaeilge i nGaeltacht na Gaillimhe a mheall 12,660 den 27,032 duine a d’fhreastail ar na coláistí in 2019. Maidir leis an €4.36 milliún a d’íoc Roinn na Gaeltachta leis na mná tí a chuir lóistín ar fáil do na coláistí in 2019, chuaigh €2.48 milliún de, nó 57%, go dtí mná tí choláistí sa Ghaillimh.
I nGaeltacht Chonamara atá cúig cinn de na deich gcoláiste is rathúla sa tír.
Gaeltacht Dhún na nGall, an dara ceantar Gaeltachta is mó a mheall scoláirí in 2019. Íocadh €804,000 le mná tí Dhún na nGall agus 5,445 duine a d’fhreastail ar chúrsaí na gcoláistí ansin anuraidh.
Cé go raibh Ciarraí siar cuid mhaith sa tríú háit le 3,512 duine agus €492,000, tá Coláistí Chorca Dhuibhne sa chéad áit ar an liosta de na deich gcoláiste is mó a mheall daoine in 2019.
Na deich gcoláiste is mó sa tír
| Coláistí | Íocaíochtaí Teaghlaigh/Brúanna 2019 | Líon Scoláirí 2019 |
|---|---|---|
| Coláistí Chorca Dhuibhne | €458,635.00 | 3,312 |
| Coláistí Lurgan, Indreabhán | €425,370.00 | 2,065 |
| Coláistí Uisce, Coláiste Uisce, Cuan Eilí | €208,725.00 | 1,955 |
| Coláistí Chamuis | €349,099.00 | 1,675 |
| Coláiste na Rinne, Port Láirge* | €125,720.00 | 1,258 |
| Coláiste Bhríde, Rann na Feirste | €150,410.00 | 1,102 |
| Coláiste Acla, Acaill | €109,800.00 | 1,059 |
| Coláiste Sheosaimh, Carna | €149,950.00 | 866 |
| Coláiste na nOileán, Tír an Fhia | €127,010.00 | 850 |
| Coláiste Chiarain, An Cheathrú Rua |
€164,200.00 | 849 |
| Iomlán | €2,104,719.00 | 14,142 |
| *Brú nó coláiste cónaithe |
3,328 duine a d’fhreastail ar chúrsaí Choláistí Chorca Dhuibhne in 2019 agus d’íoc Roinn na Gaeltachta €477,000 le mná tí Comharchumann Chorca Dhuibhne, ar leo na coláistí in iarthar Duibhneach.
Tá sé choláiste samhraidh ar fad i gceist le Coláistí Chorca Dhuibhne, an t-aon dream a mbíonn cúrsaí samhraidh á reáchtáil acu i nGaeltacht Chiarraí.
De na sé choláiste sin ba i gcoláiste Bhaile an Fheirtéaraigh a bhí an líon is mó daltaí – 869.
Chomh maith leis sin, tá 393 ábhar oide ó Hibernia agus 83 mac léinn ó UCC i gceist sna figiúirí do Choláistí Chorca Dhuibhne.
| Contae | Íocaíochtaí Teaghlaigh/Brúanna 2019 | Líon Scoláirí 2019 |
|---|---|---|
| Gaillimh | €2,479,635.00 | 12,660 |
| Dún na nGall | €804,586.00 | 5,445 |
| Ciarraí | €492,800.00 | 3,512 |
| Maigh Eo | €355,485.00 | 3,278 |
| Port Láirge | €125,720.00 | 1,258 |
| Corcaigh | €59,270.00 | 622 |
| An Mhí | €44,600.00 | 257 |
| Iomlán | €4,362,096.00 | 27,032 |
Maidir leis na coláistí atá faoi úinéireacht phríobháideach, is é Coláiste Lurgan in Indreabhán i gConamara an coláiste is rathúla sa tír ó thaobh líon na scoláirí a mheallann sé.
2,065 duine óg a d’fhreastail ar chúrsaí samhraidh Choláiste Lurgan in 2019 agus €425,000 a fuair na mná tí a chuireann lóistín ar fáil do dhaltaí an choláiste sin.
Sa tríú háit ar an liosta de na deich gcoláiste is mó ar fhreastail daltaí orthu in 2019 tá Coláiste Uisce i Maigh Eo.
1,955 dalta a d’fhreastail ar Choláiste Uisce agus fuair lucht lóistín an choláiste €208,000 ó Roinn na Gaeltachta anuraidh.
Coláiste Chamuis an ceathrú coláiste ba rathúla sa tír ó thaobh líon na ndaltaí in 2019. 1,675 a d’fhreastail ar na ceithre ionad atá ag Coláiste Chamuis in 2019 agus fuair na mná tí €349,000 dá réir.
I nGaeltacht Chonamara atá leath de na deich gcoláiste samhraidh ba rathúla ó thaobh líon na ndaltaí in 2019.
Is iad na trí choláiste eile i gConamara atá ar an liosta ná Coláiste Sheosaimh i gCarna atá san ochtú háit, Coláiste Thír an Fhia i gceantar na n-oileán atá sa naoú háit agus Coláiste Chiaráin ar an gCeathrú Rua atá sa deichiú háit.
Tá dhá choláiste i Maigh Eo i measc na ndeich gcoláiste is mó a mheallann scoláirí, Coláiste Uisce agus Coláiste Acla.
Níl ach coláiste amháin i nDún na Gall i measc na ndeich gcoláiste is mó ar fhreastail scoláirí orthu in 2019, Coláiste Bhríde i Rann na Feirste. Sa séú háit atá Coláiste Bhríde le 1,102 dalta agus €150,000 a fuair mná tí an choláiste.
Tá dhá bhrú nó coláiste cónaithe ar an liosta, Coláiste na Rinne i bPort Láirge agus Coláiste Uisce i Maigh Eo.
Cé gur daltaí scoile a d’fhreastail ar choláistí samhraidh atá i gceist leis an 27,000 duine atá luaite sna figiúirí nua, baineann beagnach 2,000 acu le cúrsaí eile do dhaltaí agus do mhic léinn.
Faoi Scéim na bhFoghlaimeoirí, íocann Roinn na Gaeltachta €10 in aghaidh an scoláire in aghaidh an lae le mná agus fir tí na Gaeltachta a chuireann lóistín ar fáil do na coláistí samhraidh.
Íocadh €4.73 an scoláire le coláistí samhraidh agus mná tí na Gaeltachta mar chúiteamh ar chur ar ceal chúrsaí na bliana seo.
Socraíodh €4 in aghaidh an dalta in aghaidh na hoíche a íoc leis na mná tí i mbliana, i gcomparáid leis an €10 á íocann an Roinn de ghnáth leo nuair a bhíonn scoláirí acu.
Faoin gciste “aon uaire” socraíodh €3.1 milliún a íoc le húdaráis an 42 coláiste samhraidh “le cur ar a gcumas táillí/éarlais a aisíoc le tuismitheoirí” agus cuireadh €1.6m ar fáil don 700 teaghlach Gaeltachta a chuireann lóistín ar fáil do na scoláirí.
Dúirt Roinn na Gaeltachta go raibh an cúiteamh á íoc “chun inmharthanacht leanúnach na hearnála a chinntiú”.
| Íocaíochtaí Teaghlaigh/Brúanna 2019 | Líon Scoláirí 2019 | |
|---|---|---|
| Gaillimh | ||
| Coláiste Lurgan, Indreabhán | €425,370.00 | 2,065 |
| Spleodar, Bóthar an Chairn Mhóir, Uarán Mór | €397,830.00 | 1,944 |
| Coláiste Chamuis | €349,099.00 | 1,675 |
| Acadamh na hOllscolaíochta Gaeilge | €174,422.00 | 898 |
| Coláiste Sheosaimh, Carna | €149,950.00 | 866 |
| Coláiste na nOileán, Tír an Fhia | €127,010.00 | 850 |
| Coláiste Chiarain, An Cheathrú Rua | €164,200.00 | 849 |
| Coláiste Cholumba, An Cheathrú Rua | €115,890.00 | 845 |
| Coláiste Chonnacht, An Spidéal | €115,950.00 | 649 |
| Coláiste Naomh Éanna, An Spidéal | €51,730.00 | 492 |
| Coláiste Uí Chadhain, Na Minna, Indreabhán | €87,340.00 | 435 |
| Coláiste Laichtín Naofa, Inis Oírr, Árainn | €70,280.00 | 374 |
| Coláiste na bhFiann, Ros Muc | €65,010.00 | 353 |
| Coláiste O Direáin, Inis Mór, Árainn | €45,220.00 | 215 |
| Coláiste Gaeilge, Inis Meáin, Árainn | €9,660.00 | 55 |
| Coláiste Gharumna, Leitir Móir | €2,670.00 | 34 |
| Coláiste Neasáin, Inis Oírr, Árainn | €4,650.00 | 31 |
| Iarbhunscoileanna ar Oileáin Árainn | €123,363.00 | 30 |
| Iomlán | €2,479,635.00 | 12,660 |
| Íocaíochtaí Teaghlaigh/Brúanna 2019 | Líon Scoláirí 2019 | |
|---|---|---|
| Dún na nGall | ||
| Coláiste Bhríde, Rann na Feirste | €150,410.00 | 1,102 |
| Coláiste Árainn Mhór, Oileán Árainn Mhór | €146,790.00 | 700 |
| Coláiste Loch an Iúir, Anagaire | €119,840.00 | 664 |
| Coláiste Mhachaire Rabhartaigh, Gort a’Choirce | €107,400.00 | 563 |
| Coláiste Chú Chulainn, Gaoth Dobhair | €47,840.00 | 502 |
| Coláiste Na Rosann, Anagaire | €19,000.00 | 498 |
| Acadamh na hOllscoileachta Gaeilge | €71,976.00 | 451 |
| Coláiste An Phiarsaigh, Dún Lúiche | €62,300.00 | 449 |
| Coláiste Aoidh Mhic Bhricne, Teileann, An Charraig | €19,660.00 | 212 |
| Coláiste Bhun an Inbhir, Na Doirí Beaga | €29,610.00 | 139 |
| Coláiste na bhFiann, Gaoth Dobhair | €22,200.00 | 111 |
| Coláiste Chara, Cill Chartha | €7,560.00 | 54 |
| Iomlán | €804,586.00 | 5,445 |
| Íocaíochtaí Teaghlaigh/Brúanna 2019 | Líon Scoláirí 2019 | |
|---|---|---|
| Ciarraí | ||
| Coláistí Chorca Dhuibhne | €458,635.00 | 3,312 |
| ERASMUS Gaeltachta, Ollscoil Chorcaí, Coláistí Chorca Dhuibhne | €18,445.00 | 16 |
| Bhréanainn, Baile an Bhuineánaigh* | €15,720.00 | 184 |
| Iomlán | €492,800.00 | 3,512 |
| Íocaíochtaí Teaghlaigh/Brúanna 2019 | Líon Scoláirí 2019 | |
|---|---|---|
| Maigh Eo | ||
| Coláiste Uisce, Cuan Eilí* | €98,525.00 | 1,195 |
| Coláiste Acla, Acaill | €109,800.00 | 1,059 |
| Coláiste Uisce, Eachléim | €110,200.00 | 760 |
| Coláiste Mhaigh Eo, Ceathrú Thaidhg | €36,960.00 | 264 |
| Iomlán | €355,485.00 | 3,278 |
| Corcaigh | ||
| Coláiste Na Mumhan, Baile Átha’n Ghaorthaidh* | €31,170.00 | 319 |
| Coláiste Samhraidh, Gleann Maghair* | €10,020.00 | 171 |
| Coláiste Phobail Chléire, An Sciobairín | €18,080.00 | 132 |
| Iomlán | €59,270.00 | 622 |
| Port Láirge | ||
| Coláiste na Rinne, Port Láirge* | €125,720.00 | 1,258 |
| Iomlán | €125,720.00 | 1,258 |
| An Mhí | ||
| Coláiste na bhFiann, Rath Cairn | €44,600.00 | 257 |
| Iomlán | €44,600.00 | 257 |
Táblaí le Tuairisc.ie bunaithe ar eolas ó Roinn na Gaeltachta
Fág freagra ar 'Cad iad na deich gcoláiste samhraidh is mó sa tír?'