Bratach Ghorm bronnta ar 12 trá Ghaeltachta, i nGaillimh, Ciarraí, Dún na nGall agus Maigh Eo

Tránna Gaeltachta iad 12 den 85 trá ar fud na tíre a bhfuil Bratach Ghorm bronnta orthu i mbliana.

D’fhógair An Taisce liosta na dtránna a bhfuil an t-aitheantas bronnta orthu do 2024 agus an bhratach bronnta ar gach ceann den dosaen tránna sa Ghaeltacht a fuair é anuraidh. Níor éirigh le haon trá nua sa Ghaeltacht an t-aitheantas a bhaint amach i mbliana.

Is i nGaillimh atá ceithre cinn de na tránna Gaeltachta a fuair Bratach Ghorm – An Trá Mhór in Indreabhán, Trá an Dóilín ar an gCeathrú Rua, Cill Mhuirbhigh ar Inis Mór agus Trá Inis Oírr.

Bronnadh Bratacha Gorma ar 13 trá i gCiarraí, níos mó ná mar a bronnadh in aon chontae eile, agus is sa Ghaeltacht atá trí cinn de na tránna sin, Fionntrá i gCorca Dhuibhne agus tránna Bhaile an Sceilg agus Dhoire Fhíonáin in Uíbh Ráthach.

Tá cúig thrá in Acaill tar éis gradam na Brataí Goirme a fháil i mbliana, trá Dhumha Éige ina measc. Tá bratacha bronnta freisin ar Chuan Oilí agus ar an Mullach Rua in Iorras.

I nDún na nGall, bhí tránna na Carraige Finne agus na nDúnaibh ar phéire den 12 trá sa chontae a fuair an Bhratach Ghorm i mbliana.

Chomh maith leis an 85 trá a bhain an gradam amach, bronnadh Bratach Ghorm ar naoi gcinn de mhuiríní, ceann níos lú ná anuraidh. Níor chuir muiríne an Chaisleáin Nua i nDún na nGall isteach ar an ngradam i mbliana de thoradh oibreacha a bheith ar bun ansin.

Caithfidh tránna caighdeáin áirithe, a bhfuil uisce snámha ar chaighdeán den scoth ar cheann acu, a bhaint amach chun go mbronnfaí Bratach Ghorm orthu.

D’fhógair an Ghníomhaireacht um Chaomhnú Comhshaoil (EPA) an tseachtain seo caite go raibh uisce ar chaighdeán den scoth ar 20 den 21 trá Ghaeltachta a ndearnadh tástáil orthu anuraidh. Tugadh rabhadh gan dul ag snámh ar Thrá na mBan ar an Spidéal i nGaillimh toisc go raibh droch-chaighdeán uisce ansin.

Chomh maith le Bratacha Gorma, bronnadh Gradam an Chósta Ghlais inniu ar 13 eile de thránna na Gaeltachta. I Maigh Eo atá cúig cinn acu, agus ceithre cinn eile i nDún na nGall a fuair an gradam. Tá na ceithre thrá Ghaeltachta eile i nGaillimh agus i gCiarraí. Bhí Trá Inis Oírr i nGaillimh agus Bhaile an Sceilg i gCiarraí ar phéire d’ocht dtrá ar fud na tíre a fuair an Bhratach Ghorm agus Gradam an Chósta Ghlais araon.

Bronnadh Bratach an Chósta Ghlais ar 70 trá ar fad, an líon is mó riamh.

Tugann Gradam an Chósta Ghlais aitheantas don phobal agus do na daoine a ghlanann an cósta agus na tránna i gcaitheamh na bliana. Bronnadh an gradam sin ar 65 trá ar fud na tíre, níos mó ná aon bhliain eile ó bunaíodh an gradam in 2003.