‘Bhí mé ag iarraidh a bheith in ann a rá ‘tá Gaeilge agam’, gur liomsa í. Go bhfuil sí mar chuid díom’ – Linda Ervine

Tá tús curtha inniu le Seachtain na Gaeilge, an fhéile teanga a bheidh ar siúl go dtí an 17 Márta.

Is iad an gníomhaí teanga as Béal Feirste Linda Ervine, an peileadóir as Baile Átha Cliath Michael Darragh MacAuley, an t-amhránaí as Ráth Chairn, Sibéal Ní Chasaide, agus an láithreoir raidió le 2fm Tracy Clifford ambasadóirí Sheachtain na Gaeilge 2019.

Dúirt Linda Ervine, Oifigeach Forbartha Gaeilge in Oirthear Bhéal Feirste agus ambasadóir Sheachtain na Gaeilge go bhféadfadh aon duine an Ghaeilge a fhoghlaim má d’éirigh léi féin an beart a dhéanamh.

“Thosaigh mé ag foghlaim na Gaeilge ocht mbliana ó shin agus ní raibh focal ar bith agam… Thit mé i ngrá leis an teanga! Mholfainn d’éinne an Ghaeilge a fhoghlaim, más féidir liomsa é a dhéanamh is féidir le duine ar bith!

“Bhí mé ag iarraidh a bheith in ann a rá ‘tá Gaeilge agam’, gur liomsa í. Go bhfuil sí mar chuid díom.”

Beidh seoladh ‘idirnáisiúnta’ ag an bhféile anocht sa London Irish Centre agus beidh an Ghaeilge i lár an aonaigh ag an gcluiche rugbaí idir Cúige Laighean agus na Cheetahs a bheidh ar siúl sa RDS.

Deirtear gur reáchtáladh os cionn 3,000 imeacht poiblí le linn na féile anuraidh agus táthar ag súil go mbeidh an fhéile níos mó fós i mbliana.