Tá an tAire Stáit do Ghnóthaí Gaeltachta, Joe McHugh, ag iarraidh go mbeidh tuairiscí nuachta i nGaeilge ar RTÉ News Six One, mórchlár nuachta Béarla an chraoltóra náisiúnta.
Mhol McHugh gur cheart deireadh a chur leis an gcleachtadh atá ann faoi láthair in RTÉ iarraidh ar iriseoirí Gaeltachta dhá leagan, leagan Béarla agus leagan Gaeilge, de thuairisc nuachta a thaifeadadh le craoladh ar RTÉ One agus ar TG4.
“Faoi mar atá sé faoi láthair, agus feicim go minic é, bíonn tuairisc nuachta i mBéarla ar an Six One agus bíonn an tuairisc cheannann chéanna ar TG4 uair an chloig ina dhiaidh sin i nGaeilge.
“Is minic a bhíonn tuairiscí Gaeltachta i gceist a taifeadadh ar dtús i nGaeilge agus iarradh ar an tuairisceoir leagan Béarla a thaifeadadh freisin. Cén fáth nach féidir le RTÉ an bunleagan Gaeilge a chraoladh agus fotheidil Bhéarla a chur air? Is dóigh liom gur féidir leo é sin a dhéanamh, tá an teicneolaíocht ann, agus tá a fhios agam go bhfuil an toil ann,” a dúirt sé.
Mhaígh McHugh go bhfuil “dea-theist” ar RTÉ an Ghaeilge a chur chun cinn go dtí seo agus go gcabhródh an cur chuige atá molta aige an teanga a chur os comhair an phobail ar bhealach nádúrtha.
“Mheallfadh sé an páiste atá ag freastal ar Ghaelscoil agus a thuismitheoirí i gContae na Mí, i gContae Lú, i mBaile Átha Cliath nó i Loch Garman, agus léireodh sé dóibh go bhfuil a theanga, a theanga dhúchais, mar chuid den phríomhchlár nuachta agus go mbaineann sí le hábhar,” a dúirt sé.
Dúirt McHugh nach raibh sé ag iarraidh ar chláir nuachta Bhéarla de chuid RTÉ “a gclár oibre nó a n-ord reatha a athrú” ach gur “céim chun cinn” a bheadh ann a chabhródh an Ghaeilge a chur os comhair an phobail i gcoitinne.
“Gach aon bhliain i rith Sheachtain na Gaeilge, ar feadh seachtaine nó mar sin, bíonn go leor tionscnamh Gaeilge ag RTÉ i gcláir nuachta agus i míreanna leanúnachais agus aimsire. Chuirfeadh sé borradh mór faoin nGaeilge dá mbeadh an meon sin ann ó cheann ceann na bliana,” a dúirt sé.
Dúirt go bhféadfaí an deis a thapú an bhliain seo chugainn agus Bliain na Gaeilge, comóradh 125 bliain ar athbheochan na Gaeilge, á ceiliúradh ag an stát.
Éilis
Thiocfainn leis seo.
Agus óráidí nó agallaimh i dteangacha iasachta a chraoladh sa mbunteanga le fotheidil.
Hiy
Tagaim go mór leis an smaoineamh sin freisin. Déantar imeallű ar gach teanga eile seachas an Béarla ar na meàin anseo.
Breathnóir
Is smaoineamh an-mhaith é seo; aontaím go hiomlán freisin gur chóir tuairiscí a thaispeáint i dteangacha eile le fotheidil in áit tráchtaireacht Bhéarla a úsáid a cheileann an bhunteanga a labhraíodh. Ba dheas an rud taispeáint do Bhéarlóirí aonteangacha na hÉireann go bhfuil a lán teangacha á labhairt ar domhan, agus nach gá gach rud a chur trí scagaire an Bhéarla.