Tá ardmholadh á thabhairt do rapálaí óg as an leas a bhaineann sé as an nGaeilge ina shaothar chun “cló nua” a chur ar cheol rap na hÉireann.
Deir an iris cheoil Hot Press go bhfuil ag éirí le Fay’d, rapálaí as Tamhlacht nach bhfuil ach 19 bliain d’aois, brí nua a bhaint as rap na tíre seo trí nasc a dhéanamh idir an traidisiún agus buillí ceoil na haimsire seo agus idir an Ghaeilge agus an Béarla.
Agus léirmheas á dhéanamh acu ar an bport dátheangach is déanaí ó Fay’d, rap saorstíle atá curtha amach ar an ardán On the Map, deir siad gur ríléir a chumas mar rapálaí dátheangach den scoth. Deir lucht na hirise go bhfuil saothar an rapálaí ina léiriú ar an athrú cultúir atá ag tarlú in Éirinn.
“Leis an úsáid a bhaineann sé as an nGaeilge agus an tsuim a chuireann sé san éagsúlacht chultúir, tá ceol Fay’d mar a bheadh droichead idir an traidisiún agus an nuálaíocht,” a deirtear.
An samhradh seo caite, ghnóthaigh ‘An Spailpín Fánach’, port dátheangach a chum Fay’d agus é ag staidéar don Ardteist, os cionn leathmhilliún amharc ar TikTok. Chum sé an port mar chuid de mhargadh a rinne sé lena mhúinteoir chun go gcuirfeadh sí siar scrúdú faoin dán ‘An Spailpín Fánach’.
Seán Mag Leannáin
Ní díograiseoir Rap mé ach aithním go bhfuil meascán mearaí de chultúir éagsúla tagtha i dtreis sa tír le roinnt blianta anuas agus is maith an rud é go bhfuil an Ghaeilge i measc na gcomhábhar sa bpota i gcónaí.