Fuair CAB an luach saothair is mó dá bhfuair siad riamh nuair a ghabh siad breis is €50 milliún i Bitcoin i ruathar a rinne siad ar theach sa Ghaeltacht.
San Ard-Chúirt inné ordaíodh d’fhear a raibh teach aige i gCorr na Móna i nGaeltacht Chonamara an Bitcoin a thabhairt ar láimh don Bhiúró um Shócmhainní Coiriúla.
Thángthas ar an gcriptea-airgeadra le linn fiosrúcháin sa cheantar Gaeltachta faoi dhíol agus soláthar drugaí trí bliana ó shin.
Ghabh na Gardaí seilbh i mí Feabhra 2017 ar luach €450,000 de channabas i dteach fáis i bhFarnocht i gCorr na Móna sa Ghaillimh.
Thug an Garda Síochána le fios ag an am go raibh an teach fáis agus ar bhain leis “an-sofaisticiúil go deo”.
Thángthas ar an teach fáis i ndiaidh do na Gardaí luach €2,000 de channabas a aimsiú i gcarr a stopadh i mBearna Bhealach Sailearnáin i gContae Chill Mhantáin, carr a bhí á thiomáint ag Clifton Collins as Cromghlinn i mBaile Átha Cliath.
Le linn an chuardaigh inar aimsíodh an cannabas i gCorr na Móna thángthas ar eolas faoi chual Bitcoin a bheith ag an bhfear, atá anois 49 bliain d’aois, agus cuireadh fios ar CAB.
Fuair CAB amach go raibh 6,000 Bitcoin ag Collins a shíltear a cheannaigh sé saor nuair a thosaigh an criptea-airgeadra.
Mí Iúil seo caite chuir CAB ordú calctha i bhfeidhm ar an gcuntas Bitcoin faoin Acht Um Fháltais ó Choireacht.
Rialaigh an Breitheamh Alex Owens sa chúirt inné gur luach saothair ar choiriúlacht a bhí sa Bitcoin agus go gcaithfí é a thabhairt ar láimh do CAB a choinneoidh é ar feadh seacht mbliana sula dtabharfar don Roinn Airgeadais é le cur sa státchiste.
Ní dhearna Clifton Collins aon agóid i gcoinne iarratas CAB.
Fág freagra ar 'An luach saothair is mó dá bhfuair siad riamh faighte ag CAB sa Ghaeltacht'