ELLLL – Romance
Chum an Corcaíoch óg Ellen King ceann de na rianta techno is draíochtúla a chuala-sa i mbliana.
Bjarki – B07
Tá an tÍoslannach Bjarki R Sigurdarson ag cumadh rianta nótálta techno le blianta beaga anuas is tá an oiread san ceoil cumtha aige gur eisigh Nina Kraviz trí albam dá chuid ar a lipéad Trip Recordings i mbliana: n’fheadar éinne ach an sásamh a chug an ceann seo dom.
February & Mars – Secret Storm At The Edge Of Night
Tá February & Mars lonnaithe i gCathair na dTreabh agus seo amhrán gleoite a chuireann tús lena gcéad albam February & Mars, a léirigh an Corcaíoch John Daly. Tá sé ar fáil anois ar an lipéad Gearmánach Mojuba Records.
Floorplan – Tell You No Lie
Sciob Robert Hood an sampla ceoil seo ó cheirnín dioscó ón mbliain 1977 – Lovin Is Really My Game le Brainstorm – is d’éirigh leis ceann de rianta móra urláir rince na bliana a chruthú as.
Aphex Twin – CheetahT2 (Ld Spectrum)
Thiteas i ngrá leis an ríf olagónach a chuireann a chosa i dtaca sa phort leath bealaigh tríd agus a fhanann linn go ceann scríbe.
Let’s Eat Grandma – Eat Shiitake Mushrooms
Iontas na n-iontas, d’éirigh le beirt ghearrchailí óga as Norwich (agus iad fós sna déaga) an pop-amhrán is fearr a chualas-sa in 2016 a chumadh.
Julianna Barwick – Nebula
Rian aoibhinn simplí é seo – ó Will, an t-albam is déanaí uaithi. Tá sraith i ndiaidh sraithe déanta dá guth agus éifeachtaí simplí buailte anuas air fad is atá an sintéiseoir ag plobarnach leis sa chúlra.
The Avalanches – Subways
Seo buaicphointe albam úr an bhanna ón Astráil. Tá glór Chandra Oppenheim, a taifeadadh sa bhliain 1980 nuair a bhí sí 10 mbliana d’aois, nasctha le ceol atá sciobtha acu ó leagan Graham Bonnet de ‘Warm Ride’, amhrán na Bee Gees.
Seti The First – The Wolves Of Summerland
I dtreo dheireadh na bliana, d’eisigh Thomas Haugh agus Kevin Murphy, atá lonnaithe san ardchathair, an t-albam is déanaí uathu (atá léirithe ag Stephen Shannon). Scuab an ceann seo na cosa fúm.
Umberto – Alienation
Dá mbeadh cumadóir nua ceoil ag teastáil ó David Lynch dá scannáin, in áit Angelo Badalamenti, shamhlóinn go ndéanfadh Matt Hill an bheart: tá idir uaigneas is chrá croí is sheachrán intinne le mothú sa phort uirlise seo ón albam is déanaí uaidh.
– Cuireann Cian Ó Cíobháin An Taobh Tuathail i láthair ar RTÉ Raidió na Gaeltachta ó Luan go hAoine, 22.00 – 00.00
Fág freagra ar 'Amhráin na bliana 2016 ón Taobh Tuathail…'