Comhghairdeas leat a Theachta, agus gach rath ort agus aghaidh á tabhairt agat ar an mbóthar go Teach Laighean Dé Máirt.
Tá ré phearsanta aisteach romhat. Níl ach 172 comhalta eile den Dáil agus scata beag iarTheachtaí Dála a bhfuil lántuiscint acu ar an athrú a thagann ar shaol gach duine a thoghtar mar ionadaí sa pharlaimint náisiúnta.
Ní foláir cuimhneamh freisin ar an athrú nach beag a thagann ar shaol duine a thoghtar an chéad uair, agus ar shaol a gcéilí nó a bpáirtithe, chomh maith lena dteaghlaigh, a muintir agus a gcairde.
Tá idir chomhairle agus achainí leagtha amach sna pointí seo a leanas – comhairle chun cuidiú leat iarracht a dhéanamh teacht ar chothromaíocht oibre is saoil. Sin agus achainí ort saothrú chun saol na tíre a fheabhsú ar dhóigh nach dtugtar do dhuine nach dtoghtar chun na Dála.
Eascraíonn an chuid is mó dá bhfuil scríofa thíos (admháil: roimh thús an chomhairimh atá sé á scríobh) ó chomhráite an scríbhneora seo le Teachtaí Dála. Is dócha nach n-aontóidh tú leis na pointí seo go léir, ach b’fhiú machnamh orthu mar sin féin agus tú ar tí dul i mbun oibre.
- Ar mhaithe leat féin
Tabhair aire duit féin. Gan dabht is féidir gairm 24/7 a dhéanamh den pholaitíocht ach tá codladh, scíth, saol pearsanta agus thar aon rud eile, sláinte de dhíth ar gach duine. Bíodh sé mar riail agat lá nó achar ama ar a laghad gach seachtain a choinneáil glan ó pholaitíocht agus ó ghlaonna/téacsanna a bhaineann le cúrsaí polaitíochta. Déan socrú le rúnaí nó le cúntóir a chuirfidh scéala chugat i gcás éigeandála.
- Na meáin shóisialta
D’fhéadfá a bheith ag scrolláil agus ag giolcaireacht ó mhaidin go hoíche ar na meáin shóisialta, mar a dhéanann Teachtaí Dála áirithe. Mura bhfuil socrú déanta agat roimhe seo, déan socrú anois faoin gcineál ábhar a sheolfaidh tú agus faoin ardán ar a seolfaidh tú é – Facebook, X, Tiktok, Instagram srl.
Ná cuir am amú ag freagairt raiméise ná ag argóint ar líne le hamadáin.
- Séimhe agus a luach
Ná bí róghéar ná róphearsanta agus Teachtaí ar an taobh eile den Dáil á gcáineadh agat – ní heol duit cé a bheas i do theannta ar thaobh an rialtais amach anseo. Níor shíl ionadaithe Fhianna Fáil agus Fhine Gael ar feadh i bhfad go mbeidís ag rialú na tíre in éineacht.
- Do chomrádaí contúirteach
Oibrigh go dian ar mhaithe le pobal an dáilcheantair agus ar mhaithe leat féin, ach coinnigh súil ghéar i gcónaí ar an teachta áitiúil eile i do pháirtí féin.
Níl namhaid níos dainséaraí ná do chomrádaí, go háirithe má shíltear nach bhfuil ach caolseans agaibh an dá shuíochán a choimeád san olltoghchán.
- Ná seachain ceisteanna
Freagair an fón má ghlaonn iriseoir ort, ar mhaithe leat féin thar aon chúis eile (níl mionlach – corrchladhaire agus rógaire – san áireamh). Mura bhfreagraíonn tú glaoch nó ceist a chuireann iriseoir freagrach ort, cothóidh tú spéis agus amhras.
- Bertie agus ceacht le foghlaim
Cuimhnigh ar a ndúirt Bertie Ahern go míchúramach le vótálaí agus é ag stocaireacht i mBaile Átha Cliath Láir, agus ar an taifeadadh a rinneadh air i ngan fhios dó.
Thuill caint an iarThaoisigh cáineadh, ní toisc gur shíl mórán gur ciníochas dáiríre a spreag é ach toisc gur thug Bertie le fios go ndéarfadh sé rud ar bith chun vótálaí a shásamh. Bí aireach, bí ionraic agus beagfhoclach mura mbíonn tuairim stuama agat.
Agus glac leis i gcónaí go bhfuil ceamara ag gach duine i ngach áit.
- Mura bhfuil bun-aidhm anois agat, bíodh
Ní gá a rá gur atoghadh do phríomhghnó. Sin ráite, fiafraigh díot féin cén gnó eile a chuirfidh tú chun cinn sula dtabharfar vóta ar do shaothar.
Mar shampla, an mbeidh tú mórtasach má thugann tú tús áite i gcónaí do dhaoine a bhfuil tithe acu in áit cuidiú le tógáil tithe agus árasán atá de dhíth ar dhaoine atá gan buan-ionad cónaithe nó atá ar imirce dá cheal?
- Éist le do lucht leanúna
Labhair ó am go ham leis na daoine a bhí ag stocaireacht ar do shon. Chun buíochas a ghabháil leo gan dabht, ach chun a fháil amach an gceapfaidh siad gurbh fhiú a ndíograis in 2026 an tairbhe ar ball.
- Níos mó ná ‘cúpla focal’ le do thoil
Labhair Gaeilge uaireanta. Mura bhfuil Gaeilge ar do thoil agat, déan iarracht í a fhoghlaim. Cuimhnigh ar dhea-shampla an Uachtaráin a d’fhoghlaim an teanga agus í meánaosta.
Fiú mura mbeidh am agat Gaeilge a fhoghlaim a chuirfeadh do chumas ar aon chaighdeán leis an Uachtarán, tuillfidh iarracht dháiríre meas.
- Ábhar misnigh, ach…
Tá seans réasúnta agat a bheith atofa san olltoghchán. Ó thús an chéid, is i bhfothoghcháin a toghadh 19 Teachta Dála an chéad uair. D’éirigh lena bhformhór (cúig Theachta dhéag) a suíocháin a choimeád sa chéad fhothoghchán a reáchtáladh i ndiaidh na bhfothoghchán.
Tá ábhar misnigh agat mar sin, ach tabhairt faoin jab nua i gceart. Faraor, ní dheimhneoidh díograis nach mbeidh imní, éiginnteacht agus amhras faoina bhfuil i ndán do do shuíochán i do chrá as seo amach, go háirithe agus lá an olltoghcháin ag teannadh leat. Fáilte go Teach Laighean!
Fág freagra ar 'A Theachta Dála nuathofa, focal i do chluas sula dtéann tú i mbun oibre i dTeach Laighean'