Tá fostaí de chuid Shinn Féin i dTionól Stormont éirithe as mar gheall ar an mbaint a bhí aige le dochar a dhéanamh do phortráid de pholaiteoir de chuid an DUP i ndiaidh ócáid Ghaeilge i Halla na Cathrach i mBéal Feirste.
Tharla an eachtra i ndiaidh ócáid cheiliúrtha a bhí ar siúl ag an eagraíocht Glór na Móna.
Dúradh i ráiteas ón eagraíocht, a bhí ag ceiliúradh 20 bliain a bunaithe, go raibh “díomá an domhain” orthu gur tharla a leithéid.
Dúirt Sinn Féin gur cuireadh ar fionraí láithreach an fostaí de chuid an pháirtí a d’admhaigh go raibh baint aige leis an eachtra inar deineadh dochar do phortráid de Wallace Browne, iarmhéara ar Bhéal Feirste.
Dúirt Sinn Féin gur cuireadh an PSNI ar an eolas faoin scéal inniu agus gur éirigh an té atá i gceist as mar fhostaí agus mar bhall de chuid an pháirtí.
Dé Sathairn seo caite a bhí an dinnéar ceiliúrtha ag Glór na Móna i Halla na Cathrach. Dúradh sa ráiteas uathu gur inné, Dé Luain, a fuair siad amach mar gheall ar an eachtra inar deineadh díobháil don phortráid. Foireann na comhairle cathrach a chuir ar an eolas iad faoinar tharla i ndiaidh críoch “fhoirmiúl” na hócáide.
Dúirt Glór na Móna go raibh an eachtra “i gcodarsnacht iomlán le héiteas agus prionsabail na heagraíochta, mar aon le spiorad rathúil an imeachta féin”.
“Tá díomá an domhain orainn gur tharla sé seo i ndiaidh oíche a bhí thar a bheith dearfach. Tá muid ag cuidiú le Comhairle Cathrach Bhéal Feirste lena bhfiosrúchán maidir le cúinsí an damáiste seo,” a dúirt Glór na Móna.
Dúirt an DUP gur baineadh an phortráid den bhalla agus gur briseadh an fráma gloine a bhí uirthi.
Deir an DUP gur cheart a fháil amach an raibh baint ag an eachtra leis an gcinneadh portráid de Niall Ó Donnghaile, iarmhéara Bhéal Feirste, a bhaint anuas i Halla na Cathrach. Tógadh an cinneadh sin i bhfianaise na conspóide faoin scéal gur éirigh Ó Donnghaile as Sinn Féin mar gheall ar ghearán gur sheol sé teachtaireachtaí míchuí chuig déagóir.
Feardorcha Ó Raghallaigh
Scriosann gníomhartha bagarthacha deighilteacha mar seo iarrachtaí Linda Irivine agus daoine eile an Ghaeilg a chur chun cinn i measc an phobail Aontachtaigh.
Níl Linda Irivne ina haonar ina cuid iarrachtaí an athmhuintearais chultúrtha a fhorbairt. In ainneoin imeaglú leanúnach faigheann sí tacaíocht ó daoine eile sa phobal Aontachtach ar nós an eagraíocht Turas agus Misean Oirthir Bhéal Feirste na hEaglaise Modhach.
Tá Scoil na Seolta an chéad Ghaelscoil in oirthear Bhéal Feirste ag beartú bogadh go dtí suíomh iar-scoil Van Morrison, Orangefield High agus tá baol ann anois de bharr an gníomh masalach seo go méadófar ar an imeaglú.
Is bocht an rud é gur ball de Shinn Féín a chuir bac tromchúiseach eile ar dhul chun cinn an athmhuintearais chultúrtha idir an dá thraidisiún. Céard atá le rá ag an “Communities minister” Deirdre Hargey (Sinn Féín) a bhíodh ag cur béim faoi leith ar athmhuintearas idir an dá thraidisiún agus í ina Ardmhéara ar an gcathair?