Ardú beagnach 60% ar líon na bpointí Ardteiste do chúrsa aistriúcháin Gaeilge le dhá bhliain anuas

117 pointe níos mó atá ag teastáil i mbliana chun cúrsa aistriúcháin Gaeilge a dhéanamh ná mar a theastaigh anuraidh.

526 pointe a theastaíonn chun an cúrsa Gaeilge agus Léann an Aistriúcháin a dhéanamh in Ollscoil na hÉireann, Gaillimh i gcomparáid le 409 pointe anuraidh agus 330 pointe in 2019.

De ghnáth is thart ar 15 áit a bhíonn ar fáil ar an chúrsa aistriúcháin.

Ach cé go raibh ardú sna pointí i gceist i gcás 75% de na cúrsaí ag Leibhéal 8 ar fad i mbliana, ní raibh ardú i gceist ach i gcás 60% de na cúrsaí Gaeilge.

85% de na cúrsaí Gaeilge a bhí i gceist anuraidh.

Laghdú ar líon na bpointí a bhí i gceist i sé cinn de na 15 chúrsa Gaeilge a bhí san áireamh i mBabhta a hAon de thairiscintí an CAO a fógraíodh inné.

Is i gcás cúrsaí Gaeilge i réimse na múinteoireachta is mó a bhí laghdú i gceist i líon na bpointí.

As na 15 chúrsa ‘Gaeilge’ ar liosta na gcúrsaí CAO i mbliana, cúig chúrsa a ndéantar iad a theagasc trí Ghaeilge agus deich gcúrsa a bhfuil an Ghaeilge mar chuid díobh a bhí i gceist. Níl gnáthchúrsaí Gaeilge na ndán san áireamh.

49 pointe níos mó a theastaíonn don chúrsa ‘Cumarsáid agus Gaeilge’ in OÉ, Gaillimh i mbliana. 410 pointe a theastaíonn don chúrsa sin i mbliana i gcomparáid le 361 pointe in 2020 agus 308 in 2019.

73 mac léinn as 200,000 a bhí i mbun staidéir in 2019-2020 ar chúrsaí tríú leibhéal a ndearnadh an teagasc trí Ghaeilge iontu.

127 cúrsa a bhí ann, idir chúrsaí trí Ghaeilge agus chúrsaí múinte Gaeilge agus 1,799 mac léinn a d’fhreastail ar na cúrsaí sin ar fad.