Os cionn 55,000 dalta ag fáil oideachas lán-Ghaeilge

Tá 248 bunscoil agus 48 iarbhunscoil sa stát a chuireann oideachas ar fáil i nGaeilge amháin

Pictiúr: Eleanor Keegan/Photocall Ireland
Pictiúr: Eleanor Keegan/Photocall Ireland

Tá 55,241 dalta ag fáil oideachas lán-Ghaeilge, de réir figiúirí nua ón Roinn Oideachais agus Scileanna.

Tá 248 bunscoil agus 48 iarbhunscoil sa stát a chuireann oideachas ar fáil i nGaeilge amháin, ag áireamh Gaelscoileanna, gaelcholáistí agus scoileanna Gaeltachta.

De réir na bhfigiúirí, tá  43,275 dalta ag freastal ar bhunscoileanna a chuireann oideachas lán-Ghaeilge ar fáil agus 11,966 dalta ag freastal ar iarbhunscoileanna a dhéanann amhlaidh.

Ní heol don Roinn cén líon daltaí atá ag freastal ar Aonad nó Sruth Gaeilge i scoileanna ar scoileanna Béarla iad toisc nach gcuirtear an t-eolas sin ar fáil nuair atá dalta á rollú.

Múintear gach ábhar trí Ghaeilge do dhaltaí i 13 iarbhunscoil arbh é an Béarla príomhtheanga an teagaisc iontu agus múintear roinnt ábhar trí Ghaeilge do dhaltaí áirithe i naoi gcinn eile d’iarbhunscoileanna.