Tá 500 teanga sa Nigéir ach tuigeann gach éinne ann an focal wahala 

Tá os cionn 500 teanga á labhairt sa Nigéir amháin ach tuigeann gach éinne ann an focal wahala (teideal an leabhair seo), a chiallaíonn ‘fadhb’. Agus an fhadhb atá á cíoradh sa leabhar seo ná amhábhar á bhaint i gceantair éagsúla ar fud an domhain; na daoine atá ag brath ar na mianaigh agus céatadán suarach den saibhreas ag dul isteach ina bpóca féin; lucht agóidíochta ag troid in aghaidh ár bhféinscriosta agus mar sin de.

Creid é nó ná creid!

Uaireanta seasann grianghraf amach ní toisc gur sárghrianghraf ann féin é ach ar an gcúis go mbaineann iontas éigin leis. Is grianghraf iontach é seo mar is duine iontach atá ann, creid é nó ná creid.

Hanuman Das Baba ab ainm dó. Ar shlí na fírinne atá sé anois. Tógadh na grianghraif seo in Vrindavan na hIndia, baile beannaithe. Fiafraíodh de cén aois a bhí sé agus dúirt sé gur déagóir óg ab ea é nuair a throid an Bhanríon Jhansi Rani in aghaidh na Sasanach.

Fágann sin go raibh sé 170 bliain d’aois(!) nuair a tógadh na grianghraif seo de.

Nuair a thit a chuid fiacla go léir amach, d’fhás cíor fiacla nua ina n-áit. Tarlaíonn sé sin uaireanta, de réir dealraimh, do dhaoine atá os cionn 100 bliain d’aois.