Rio 2016/Clár an lae: Na hÉireannaigh a bheidh san iomaíocht inniu…

Tá eolas anseo faoi na hÉireannaigh uile a bheidh san iomaíocht inniu ag na Cluichí Oilimpeacha, faoi cé air ba cheart súil a choinneáil agus faoi na himeachtaí móra eile i Rio inniu

Pádraic Ó Ciardha

Dé Domhnaigh, Lúnasa 14 2016 ag 7:00 am

Dé Domhnaigh, 14 Lúnasa

15:17 – Padraig Harrington – Babhta 3

12:52 – Séamus Power – Babhta 3

13:30 – Fionnuala McCormack, Lizzie Lee & Breege Connolly – Maratón

01:30 – Ciara Mageean – 1500m (Babhta Leathcheannais)

15:30 – Michael Conlan v Aram Avagyan (an Airméin) – Coileachmheáchan 56kg (Babhta an 16)

14:00 – Greg Broderick – Seóléimneach (Babhta Cáilithe)

Iomaitheoir an Lae – Fionnuala McCormack (Maratón)

Seo é an tríú huair do McCormack freastal ar na Cluichí Oilimpeacha agus í san iomaíocht i rásaí difriúla gach aon uair. Sa léimrás 3,000m a bhí sí i mBeijing, an 5,000m agus an 10,000m i Londain agus tá sí anois i Rio ag rásaíocht sa cheann is faide, an maratón.

Bhain sí áit amach sa 10,000m an uair seo chomh maith ach roghnaigh McCormack díriú ar an maratón. Cháiligh sí do na Cluichí Oilimpeacha tar éis di críochnú sa 13ú háit i maratón Chicago agus cé gur beag seans a bheidh aici bonn a bhaint amach, bheadh sí sásta má éiríonn léi sáriarracht phearsanta nua a bhaint amach i Rio.

Heroes: The Best Of Inpho Sports Photography 30/11/2013 These pictures are from the book and can be used free of charge when used in connection with articles about the book. The book is available at www.inpho.ie/book Usain Bolt wins another gold medal at the Bejing Olympics, 2008 Mandatory Credit ©INPHO/Morgan Treacy — ©INPHO/Morgan Treacy

Rogha an Lae

Meastar rás 100m na bhfear mar cheann de phríomhchomórtais na gCluichí Oilimpeacha ach beidh ort fanacht i do shuí deireanach san oíche má tá tú ag iarraidh breathnú beo air i Rio. Is ag 02:25 maidin Dé Luain a chuirfear tús leis an rás ach seans gurbh fhiú duit é.

Is idir Usain Bolt agus Justin Gatlin is mó atá sé agus Bolt sa tóir ar a thríú bonn óir as a chéile sa rás. Is ag Bolt a bheidh an chuid is mó den tacaíocht, go háirithe ó tharla gur cuireadh Gatlin ar fionraí faoi dhó de bharr mí-úsáid drugaí, ach is é Gatlin is tapúla i mbliana agus is aige atá an buntáiste sa rás.