Páirc an Chrócaigh, an Aviva agus Páirc Mhic Easmainn ar ghearrliosta na staideanna do Chraobh Sacair na hEorpa 2028

D’fhéadfadh sé tarlú go n-imreofarí cluichí i bPáirc an Chrócaigh, Staid Aviva agus Páirc Mhic Easmainn má éiríonn leis an tairiscint atá á déanamh EURO 2028 a imirt in Éirinn agus sa Ríocht Aontaithe.

Tá tairiscint déanta ag cumainn sacair na hÉireann, Thuaisceart Éireann, Shasana, na Breataine Bige agus na hAlban craobh na hEorpa a reáchtáil faoi cheann sé bliana agus cuireadh comhad tairisceana faoi bhráid UEFA inniu.

Ar maidin inniu deimhníodh an 14 staid a bhain áit amach ar an ngearrliosta tairiscintí agus tá trí cinn in Éirinn ina measc – Páirc an Chrócaigh agus Staid Aviva i mBaile Átha Cliath agus Páirc Mhic Easmainn i mBéal Feirste, atá le hathfhorbairt.

Roghnófar 10 staid ón ngearrliosta sin a bheidh ina gcuid den iarratas deireanach a dhéanfar san earrach.

Staid amháin in Albain – Hampden Park i nGlaschú – agus ceann sa Bhreatain Bheag – Principality Stadium i gCaerdydd – atá roghnaithe. Is i Sasana atá na naoi staid eile – Villa Park, Goodison Park, London Stadium, Tottenham Hotspur Stadium, Wembley Stadium, Etihad Stadium, St James’ Park, Stadium of Light agus Old Trafford.

Chinn an Rialtas ó dheas inné tacaíocht a thabhairt don tairiscint agus súil ann go bhféadfaí ceann de mhórchomórtais sacair an domhain a reáchtáil sa tír den chéad uair.

Dúirt an tAire Caiteachais Phoiblí agus Athchóirithe, Michael McGrath, inné nach mbeadh infheistíocht shuntasach ag teastáil chun Páirc an Chrócaigh ná Staid Aviva a fhorbairt don chomórtas.

Tá obair mhór le déanamh ar Pháirc Mhic Easmainn más léi a bheith réidh don chomórtas. Tá breis is deich mbliana ann ó imríodh cluichí ar phríomhpháirc CLG Aontroma ach tá cead faighte an pháirc a athfhorbairt agus tá sé i gceist tús a chur leis an obair an bhliain seo chugainn.

Measadh ar dtús go gcosnódh an obair athfhorbartha sin £75 milliún ach meastar anois go bhféadfadh go mbeadh a dhá oiread sin ag teastáil don phlean le staid a thógáil ina mbeadh suíochán ag 35,000 duine.

Dá n-éireodh le trí staid na tíre seo a bheith ina gcuid den iarratas deireanach, d’fhéadfaí suas le 11 cluiche a imirt in Éirinn – ceithre cinn i bPáirc Mhic Easmainn agus seacht gcinn idir Staid Aviva agus Páirc an Chrócaigh.