Tá ócáid in Araibis ar chlár na féile ag Oireachtas na Samhna den chéad uair riamh i mbliana. Dúirt urlabhraí de chuid an Oireachtais le Tuairisc gurb iad Banat Al-Quds (‘Iníonacha Iarúsailéim’) an chéad ghrúpa Araibise a cuireadh ar an gclár i stair na féile.
Ní hiad an tOireachtas féin atá ag eagrú na ceolchoirme a mbeidh Banat Al-Quds ina bun i Halla Whittle i mBéal Feirste anocht. Tá cúpla ócáid ‘seachtrach’, nach bhfuil clúdaithe in ollticéad na féile, luaite ar an gclár mbliana, mar a bhíonn blianta eile.
Tá 35 bean óg as an bPalaistín, atá idir 13 agus 26 bliain d’aois, páirteach sa ghrúpa ceoil Banat Al-Quds. Is cór trí chuid agus grúpa ceoltóirí uirlise iad an ensemble. Deir siad gur rud as an ngnáth é go mbeadh mná i mbun an cheoil Araibise, ealaín a bhfuil na fir go mór i dtreis inti, dar leo.
Tháinig an grúpa le chéile san ionad mór ceoil in Iarúsailéim, ESNCM, agus tá ceolchoirmeacha déanta acu ar fud na Palaistíne, agus i dtíortha eile i bhfad i gcéin óna dtír dhúchais. Deir siad go mbíonn scéalta mhuintir na Palaistíne á n-insint acu trí mheán an cheoil.
Ar na hócáidí seachtracha eile, tá an dráma Faoi Dheireadh Thiar le Joe Steve Ó Neachtain, a bheidh á léiriú ag an gcompántas drámaíochta Lóchrann in Amharclann Mhic Cionnaith sa Chultúrlann ar Bhóthar na bhFál; an scannán Aontas a bheidh á thaispeáint in Cineworld ag Cé na Banríona tráthnóna Dé hAoine; agus an cheolchoirm speisialta a d’fhógair baill Kneecap don oíche anocht.
Fág freagra ar 'Ócáid in Araibis ar siúl ag Oireachtas na Gaeilge den chéad uair riamh'