Is í Michelle O’Neill ceannaire nua Shinn Féin ó thuaidh. Tá O’Neill, atá ina Comhalta den Tionól Reachtúil do thoghcheantar ‘Lár-Uladh’ agus bhí sí ina hAire Sláinte san Fheidhmeannas deiridh.
Tagann sí i gcomharbacht ar Martin McGuinness, a d’éirigh as ag tús na bliana seo i bhfianaise na conspóide a bhain leis an scéim teasa inathnuaite, RHI.
Is as Cluain Eo i gContae Thír Eoghain í O’Neill ó dhúchas. Bhí baint aici le cúrsaí polaitíochta ó bhí sí ina déagóir agus bhí sí i róil shinsearacha éagsúla i Sinn Féin ó shin. D’oibrigh sí i dTionól Stormont ó 1998 go 2005 mar chomhairleoir polaitíochta ag an iar-CTR, Francie Molloy, sular sheas sí féin don rialtas áitiúil in 2005.
Bhí sí ina comhairleoir ar Chomhairle Dhún Geanainn agus Thír Eoghain Theas ó 2005 go 2010 agus ba í an chéad bhean a bhí ina Méara ar Dhún Geanainn.
Ceapadh ina hAire Talmhaíochta agus Forbartha Tuaithe í i ndiaidh thoghchán 2011. Atoghadh í i dtoghchán na bliana seo caite agus ceapadh ina hAire Sláinte í.
