Liam Ó Muirthile i measc na n-údar a mbeidh staidéar á dhéanamh ar a saothar don Teastas Sóisearach

Tá an dán ‘Cad é’ le Liam Ó Muirthile, an scríbhneoir aitheanta a bhásaigh an tseachtain seo caite, i measc na saothar atá roghnaithe ag an NCCA do chúrsa nua an Teastais Shóisearaigh atá dírithe ar chainteoirí líofa Gaeilge.

Tá liosta foilsithe ag an Chomhairle Náisiúnta Curaclaim agus Measúnachta de na ‘téacsanna’ Gaeilge, idir phrós, fhilíocht, amhráin agus ghearrscannáin, ar féidir staidéar a dhéanamh orthu do scrúdú an Teastais Shóisearaigh ó 2020-2022. 

Faoin leagan amach nua atá ar scrúdú Gaeilge an Teastais Shóisearaigh a tháinig i bhfeidhm anuraidh, tá dhá shiollabas anois ann, ceann atá oiriúnach do chainteoirí dúchais agus cainteoirí líofa Gaeilge agus ceann d’fhoghlaimeoirí.

Úrscéalta T1

16 úrscéal atá molta ar an liosta nua do chúrsa na gcainteoirí líofa, agus i measc na scríbhneoirí a bhfuil saothair leo ar an liosta sin tá Seán Mac Mathúna, Alan Titley, Diarmuid Ó Ceallaigh, Jackie Mac Donncha, Cathal Ó Sándair, Peadar Ó Cualáin agus Ré Ó Laighléis.

Seachtar ban atá ar liosta na n-úrscéalta: Áine Ní Ghlinn, Ríona Nic Congáil, Muireann Ní Bhrolcháin, Claire Lyons, Anna Heussaff, Laoise Ní Chléirigh agus Áine Uí Fhoghlú.

Lena chois sin, tá 15 gearrscéal molta mar rogha do mhúinteoirí agus daltaí atá i mbun an chúrsa nua atá dírithe ar scoileanna Gaeltachta agus scoileanna lán-Ghaeilge.

I measc na scríbhneoirí a bhfuil gearrscéalta leo ar an liosta tá Alex Hijmans, colúnaí le Tuairisc.ie, Orna Ní Choileáin, Ré Ó Laighléis, Pádraig Mac Piarais, Jackie Mac Donncha agus Ógie Ó Céilleachair.

Gearrscéalta T1

Tá dánta le filí óga agus filí seanbhunaithe molta ar liosta na filíochta, ina measc Liam Ó Muirthile, Louis de Paor, Nuala Ní Dhomhnaill, Ailbhe Ní Ghearbhuigh, Caitríona Ní Chléircín.

10 ngearrscannán atá molta dóibh siúd a bheidh ag tabhairt faoin chúrsa.

I measc na scannán sin, tá Rúbaí (2015) le Louise Ní Fhiannachta agus Turas Téarnaimh (1954) le Gerard Healy.

Tá cúig cinn de dhrámaí molta mar rogha do chúrsa na gcainteoirí dúchais chomh maith.

Filíocht T1

Tá liostaí fada amhrán molta don dá chúrsa, idir amhráin thraidisiúnta agus amhráin chomhaimseartha, ina measc ‘Faoiseamh’ le Spats Columbo agus ‘An Saol Rúnda’ le hOisín Mac, ‘An Seanduine Dóite’ agus ‘Mise Éire’.

Beidh ar dhaltaí i scoileanna a shocraíonn an cúrsa Gaeilge T1 tabhairt faoi dhá úrscéal, aon dráma amháin, deich ndán/amhrán agus ar a laghad dhá ghearrscéal agus dhá ghearrscannán.

Is féidir leo na saothair a roghnú as na liostaí thíos atá curtha ar fáil ag an NCCA. 

Gearrscannáin T1

Amhráin T1

Drámaí T1