Iarfhocal leathshásúil curtha le scéal na mbréagán is ansa linn

Tá sé deacair a chreidiúint go bhfuil ceithre bliana ar fhichid gafa tharainn ó chuir an chéad scannán Toy Story an lucht féachana faoi dhraíocht. Tá a gcuid páistí féin ag na páistí a bhain súp as an gcéad gheábh ar scáileán ag Woody, Buzz agus a gcomrádaithe.

Ba é an scannán úd an chéad táirge ó cheárta Pixar agus aithnítear go forleathan gur chloch mhíle scannánaíochta a bhí ann. D’éirigh leis an ríomhbheochan cheannródaíoch, na carachtair chaithiseacha agus an scéal mothúchánach greannmhar cliste idir óg agus aosta a mhealladh. Fágadh lorg ar an tionscal agus deineadh fathach de Pixar. Seo an t-aonú scannán is fiche uathu agus dorn eile ar na bioráin acu.

Nuair a d’fhág Andy a chuid bréagán le huacht ag cailín óg darbh ainm Bonnie naoi mbliana ó shin mheasamar go raibh an dlaoi mhullaigh curtha ar thriológ na mbréagán. Ní mar a shíleadh a bhí, áfach. Ní fhéadfaí bréagáin chomh luachmhar leo seo a fhágaint caite ar chúl an chófra. B’éigean cur le scéal a bhí críochnaithe, agus dá bhrí sin is saghas iarfhocal atá anseo. Cé nach bhfuil sé gan a mhaitheasaí níl an táirge seo inchurtha lena réamhtheachtaithe.

Cuirtear abhaile orainn ag tús Toy Story 4 nach bhfuil Woody (Hanks) istigh leis féin óir nach é atá ina cheann feadhna ar sheomra Bonnie. Tá sé in áit na leathphingine go hiomlán. Nuair a thugann Bonnie bréagán a dhein sí ar scoil abhaile léi tógann Woody faoina chúram é. Is é aistear Forky (Hale) croílár an scannáin ar shlí. Faoi mar atá tarlaithe cheana bíonn ar na bréagáin aghaidh a thabhairt ar an domhan mór dainséarach taobh amuigh den seomra leaba. Bíonn cad é eachtraíocht agus carúil ghrinn fite fuaite le maoithneachas agus brón.

Ba í an chomrádaíocht idir Buzz agus Woody bunchlocha an chnuasaigh ó thús agus déantar an pháirtnéireacht sin a bhriseadh anseo. Is cuma ann nó as Buzz i ndáiríre agus a chuid eachtraí siúd mar saghas eireaball ar an bpríomhscéal. Is amhlaidh atá leis na seanfhondúirí eile: Jessie, Bullseye, Ham, Rex agus Mr Potato Head.   

Is í Bo Peep (Potts) atá i lár an aonaigh le Woody. Carachtar tánaisteach a bhí inti sa chéad dá cheann agus bhí sí as láthair ar fad ón tríú gála. Claochlú iomlán tagtha uirthi anseo agus í ag paidhceáil léi sa saol mar ‘bhréagán caillte’. Lena cois siúd tá an t-éachtóir Duke Caboom (Reeves) mar aon leis na  bréagáin chlúimhíneacha Ducky agus Bunny (Key agus Peele).  Is í an mheitheal seo a dhéanann cuid mhaith den scéal a iompar agus déantar cúpla radharc seoigh a sholáthar sa siopa seandachtaí.

Tháinig an chríoch aniar aduaidh orm agus níor thaitin sé liom mar measaim go ndéanann sé beagán d’aistear na gcarachtar le breis agus fiche bliain anuas. É sin nó tá an maoithneachas ag fáil an ceann is fearr orm.