Géarghá le liúntais Ghaeltachta do mhúinteoirí — príomhoide Gaeltachta

Tá ráite ag príomhoide meánscoile Gaeltachta go bhfuil “géarghá” na liúntais a d’íoctaí le múinteoirí a ghlacadh le poist i scoileanna sa Ghaeltacht a thabhairt ar ais.

Cuireadh deireadh leis an liúntas do mhúinteoirí nua a bhain a gcáilíocht mhúinteoireachta amach i ndiaidh 2012 tamall de bhlianta ó shin. Fágann sé sin nach bhfaigheann múinteoirí aon airgead breise le dul ag múineadh trí mheán na Gaeilge i scoileanna Gaeltachta.

“Bíonn sé deacair daoine a fháil a bhfuil Gaelainn acu, gan trácht ar dhaoine a bhfuil Gaelainn mhaith acu,” a mhaígh Pádraig Firtéar, príomhoide Phobalscoil Chorca Dhuibhne i nGaeltacht Chiarraí, leis an gclár An Saol Ó Dheas ar RTÉ Raidió na Gaeltachta.

Dúirt sé gur líonadh cúpla post múinteoirí sa scoil le deireanas ach nach raibh “rogha” ag an scoil ó thaobh iarrthóirí ar na poist éagsúla. Dúirt sé nach bhfuil sé “sláintiúil” nach mbeadh iomaíocht ann do phoist mar sin.

“Bíonn sé go hiontach nuair a bhíonn coimhlint ann agus bíonn roinnt daoine istigh ar phost. Is féidir leat iad a chur i gcomparáid le chéile.

“Tá an méid atá ag cur isteach ar a bheith ag múineadh trí Ghaelainn tite go mór, is dócha, leis, go bhfuil na liúntais a bhí ag dul leis gearrtha agus tá géarghá iad a fháil ar ais,” a dúirt sé.

Dúirt sé nach raibh “aon mhaith scoileanna Gaeltachta a bheith againn” mura mbíonn múinteoirí le Gaeilge ar fáil do na scoileanna sin.