Deirfiúr leis an Uachtarán Connolly ar dhuine den seisear Éireannach ar bháid fóirithinte atá faoi choinneáil ag Iosrael

I ráiteas ó chabhlach Global Sumud 2026 dúradh gur stop fórsaí Iosrael deich mbád as an 60 bád atá páirteach sa gcabhlach fóirithinte tamall gairid tar éis a naoi a chlog ar maidin inniu agus iad ag seoladh in uiscí idirnáisiúnta.

Dúirt lucht eagraithe na fóirithinte go raibh na báid thart ar 70 míle farraige ó chósta na Cipire nuair a stopadh iad. Cuireadh seisear ar a laghad den chúigear déag Éireannach a bhí ar na longa faoi choimeád.

Tá físeáin eisithe ag an gcabhlach ina bhfeictear an Dr Margaret Connolly agus cúigear eile agus an chuma air gur taifeadadh na físeáin sin sular cuireadh an seisear faoi choimeád.

I ráiteas ón Dochtúir Connolly sa bhfíseán deir sí:

“Má tá tú ag breathnú ar an bhfíseán seo, tá mise fuadaithe as mo bhád sa gcabhlach fóirithinte ag fórsaí forghabhála Iosrael agus tá mé anois i ngéibheann go mídhleathach i bpríosún Iosraelach.

“Tá fíorbhród orm a bheith páirteach sa gcabhlach seo – an ceann is mó go dtí seo.”

Is iad an cúigear Éireannach eile atá gafa Catriona Graham, Louise McCormack, Joshua St Leger, Cormac O’Daly and Tom Deasy.

Den tríú huair ag an gcabhlach Global Samud, d’fhág longa deisceart na Tuirce Déardaoin tar éis d’fhórsaí Iosrael iarrachtaí eile a rinne longa soláthar fóirithinte a chur ar fáil do phobal Gaza a stopadh in uiscí idirnáisiúnta.

I ráiteas ó Iosrael, éilíodh “go n-athródh na rannpháirtithe cúrsa agus iompú thart ar an bpointe”.

I bpostáil ar X ó aireacht gnóthaí eachtracha Iosrael, dúradh nach gceadófaí “aon sárú ar an imshuí dlíthiúil ar Gaza”.