Cúrsa nua cnocadóireachta agus Gaeilge ag Oidhreacht Chorca Dhuibhne 

Tá cúrsa nua cnocadóireachta agus Gaeilge fógartha ag Oidhreacht Chorca Dhuibhne agus súil acu daoine a mhealladh ar mhaith leo feabhas a chur ar a gcuid Gaeilge agus iad amuigh faoin aer.

Cúrsa cúig lá a bheidh i gceist leis an gcúrsa agus é le reáchtáil ag deireadh na míosa seo – ó 28 Lúnasa go 2 Meán Fómhair – i gCorca Dhuibhne. Ar shléibhte arda agus ar chnoic réidhe na dúiche a thabharfaidh rannpháirtithe an chúrsa a n-aghaidh agus iad á dtreorú ag an gceannaire sléibhte Maitiú Ó Coimín.

An Ghaeilge teanga an chúrsa agus beidh béim ann ar fhocail, nathanna, agus téarmaí a bhaineann leis an talamh ard, na plandaí fiáine na gcnoc, agus na hainmhithe agus éin a aimsítear ann. Roinnfidh an treoraí eile, Mícheál Ó Mainín, seanchas agus stair an cheantair leis na rannpháirtithe.

“Tá mé ag súil go mór le cúpla lá a chaitheamh i measc na gcnoc i gCorca Dhuibhne, tá áilleacht thar na bearta le fáil anseo agus an áit beo le seanchas agus stair. Beidh an cúrsa seo iontach do dhaoine ar mhaith leo radharc nua a fháil ar Ghaeltacht Chorca Dhuibhne agus é sin a dhéanamh i gcomhluadar breá Gaelach.

“Is ar áiteacha nach dtaithíonn an gnáth-thurasóir, ná go deimhin an gnáthfhoghlaimeoir Gaeilge, a bheidh muid ag tabhairt ár n-aghaidhe le linn an chúrsa agus réimse leathan de shiúlóidí pleanáilte againn,” a dúirt Maitiú Ó Coimín.

Ní fhógrófar go baileach cé na siúlóidí a dhéanfar ar an gcúrsa mar gheall go mbeifear ag brath go mór ar chúinsí aimsire ach go bhfuil “os cionn deich siúlóid pleanáilte” agus go roghnóidh na treoraithe an tsiúlóid is feiliúnaí de réir na haimsire.

I measc na siúlóidí a d’fhéadfaí a dhéanamh, áfach, tá turas chuig an Sás, turas go barr Chnoc Bréanainn, Sliabh an Iolair, an Géarán, agus fiú turas go dtí an Cró Mór ar an mBlascaod Mór ach an aimsir a bheith oiriúnach.

“Is iontach an rud é go bhfuil an oiread sin ranganna Gaeilge ar fáil anois, idir ranganna ar an láthair agus ranganna ar líne, ach d’fhéadfá a rá go bhfuil ganntanas deiseanna ann fós do dhaoine ar mhaith leo an Ghaeilge atá acu a úsáid – tá súil againn go bhfreastalóidh an cúrsa seo ar chuid de na daoine sin.

“Deis a bheidh ann a bheith amuigh faoin aer, a bheith aclaí, eolas a chur ar áit nua, agus cur le do stór focal agus an réimse teanga atá agat. Tá muid ag súil go mór le fáilte a chur roimh na siúlaithe go Corca Dhuibhne,” a dúirt Maitiú O Coimín.

Idir 5km agus 15km a bheidh na siúlóidí a dhéanfar agus costas €315 a bheidh ar an gcúrsa cúig lá. Clúdóidh an costas sin na siúlóidí treoraithe agus an costas bus a bhainfidh leis an gcúrsa ach beidh ar na siúlaithe a socruithe lóistín a dhéanamh. Tá gach eolas ar fáil ó Oidhreacht Chorca Dhuibhne.