Craobh cúigear an taobh na hÉireann buaite ag Gaelscoil ó Chorcaigh i Staid Aviva

Gaelscoileanna ar fad a bhain áit amach i gCraobh ‘C’ na gCailíní a imríodh san Aviva an tseachtain seo agus bainisteoir na hÉireann, Stephen Kenny, i láthair

Stephen Kenny, Jamie Finn, Conor Levingston agus Uachtarán an FA, Gerry McAnaney, le foireann bhuacach Ghaelscoil Charraig Uí Leighin. Pictiúr: Stephen McCarthy/Sportsfile

Dé hAoine, Meitheamh 2 2023 ag 5:30 am

Bhí cailíní ó Ghaelscoil i gCorcaigh ag ceiliúradh i Staid Aviva an tseachtain seo tar éis dóibh craobh na hÉireann a thabhairt leo i gcomórtas sacair de chuid an FAI.

Gaelscoil Charraig Uí Leighin a thug leo Craobh ‘C’ na gCailíní i mBabhtaí Ceannais Cúigear an Taobh na mBunscoileanna san Aviva, an chéad Ghaelscoil riamh a bhuaigh an chraobh.

Aisteach go leor, Gaelscoileanna uile a bhí páirteach sa chomórtas áirithe sin tar éis do Ghaelscoil Charraig Uí Leighin, Gaelscoil Mhic Amhlaigh i nGaillimh, Scoil Uí Riada i gCill Dara agus Gaelscoil Adhamhnáin i nDún na nGall craobhacha a gcúigí a bhaint roimhe seo.

Scoil Uí Riada, Cill Choca. Ar chúl, Sorcha Ní Ghiolla, Lauren de Búrca, Sorcha Breathnach, Annabelle Nic Ghiolla Fhiondáin, Ailbhe de Faoite agus Breandán MacGabhann. Chun tosaigh, Ella Ní Bhroin, Caoilfhinn Ní Raghallaigh, Molly Ní Thaillúir agus Emma de Creag. Pic: Stephen McCarthy/Sportsfile

Cailíní óga Chorcaí ab fhearr sna babhtaí ceannais i mBaile Átha Cliath agus na trí chluiche a d’imir siad buaite acu san Aviva. Bhuaigh siad ar Gaelscoil Mhic Amhlaigh ó Chnoc na Cathrach i nGaillimh sa chluiche deireanach acu chun an chraobh a bhaint.

Gaelscoil Adhamhnáin, Leitir Ceanainn. Ar chúl, Pól Mac Giolla Bhríde, Grace Nic Fhloinn, Aoibhe Nic Pháidín, Lucy Nic Suibhne, Aoife Ní Chionnaith agus Annita Nic Daibhéad. Chun tosaigh, Jessica Ní Bheirn, Éadaoin Ní Chinnéide, Ciara Ní Chuilinn agus Féile Ní Mhearthaile. Pic: Stephen McCarthy/Sportsfile

Ba í Lucy Ní Choitir ó Ghaelscoil Charraig Uí Leighin a bhuaigh an gradam d’Imreoir an Chomórtais agus an t-imreoir idirnáisiúnta le foireann ban na hÉireann, Jamie Finn, a bhronn an gradam ar Lucy. Bhí bainisteoir fhoireann idirnáisiúnta na bhfear, Stephen Kenny, i láthair do bhronnadh na mbonn chomh maith agus chas sé leis na foirne uile.