Tá súil ag an Aire Gaeltachta Dara Calleary go n-eiseofar na cáipéisí tairisceana do chonarthaí do sheirbhísí iompair go Toraigh agus Árainn Mhór “sna seachtainí amach romhainn”.
Tháinig deireadh leis an gconradh reatha do sheirbhís farantóireachta d’Árainn Mhór ar an 31 Lúnasa 2024 agus tháinig deireadh leis an tseirbhís lastais do Thoraigh ar an 30 Meitheamh 2024. Cuireadh síneadh sé mhí leis an dá sheirbhís sin faoi dhó “lena chinntiú go leanfadh an tseirbhís ar aghaidh” a fhad is atá an próiseas athnuachana ar bun.
Dúirt an tAire Calleary go bhfuil an athnuachan ar bun i láthair na huaire agus go n-eiseofar tairiscint phoiblí don dá sheirbhís “go luath”.
“Rinneadh próiseas comhairliúcháin leis na pobail oileánda anuraidh agus dréachtaíodh na cáipéisí tairisceana le cur san áireamh, mar is cuí, na riachtanais phobail atá ag gach oileán. Tá an Roinn ag súil go n-eiseofar na cáipéisí do na seirbhísí sna seachtainí atá amach romhainn,” a dúirt sé mar fhreagra ar cheist a chuir an Teachta Dála Pearse Doherty sa Dáil.
Tá cúig chonradh seirbhíse i bhfeidhm d’oileáin Thoraí agus Árainn Mhór – seirbhísí lastais, seirbhísí farantóireachta, agus seirbhís ingearáin go Toraigh.
Fág freagra ar 'Cáipéisí tairisceana do chonradh seirbhíse iompair Thoraí le heisiúint'