Bhí caighdeán uisce den scoth ag beagnach gach trá Ghaeltachta a ndearnadh scrúdú orthu anuraidh.
De réir na tuarascála is déanaí de chuid na Gníomhaireachta um Chaomhnú Comhshaoil (EPA), bhí caighdeán uisce den scoth ag 19 den 22 láthair Ghaeltachta a ndearnadh tástáil orthu le linn 2025. Caighdeán maith uisce a bhí ag péire eile i nGaeltacht Chonamara, Trá na bhForbacha agus Trá na mBan ar an Spidéal.
Thit caighdeán an uisce snámha ag Trá na bhForbacha ó ‘chaighdeán den scoth’ in 2024 go dtí ‘caighdeán maith’ anuraidh.
Ba í 2025 an chéad bhliain ó 2018 a raibh caighdeán maith uisce ag Trá na mBan ar an Spidéal. Thug an EPA rabhadh do dhaoine in 2024 gan dul ag snámh ar an trá mar gheall ar dhroch-chaighdeán an uisce. Tá ionad cóireála fuíolluisce a tógadh ar an Spidéal chun dul i ngleic le fadhb an truaillithe uisce ag feidhmiú ó dheireadh 2023 agus aithníodh i dtuarascáil na bliana seo caite go raibh cúrsaí feabhsaithe ag Trá na mBan dá bharr.
Tá an linn taoide i mBéal an Mhuirthead san áireamh i dtuarascáil an EPA den chéad uair ach caithfear í a thástáil ar feadh bliana eile sula bhféadfar caighdeán an uisce inti a rangú.
Bhí uisce ar chaighdeán den scoth ar gach trá Ghaeltachta eile atá luaite sa tuarascáil, tránna i nDún na nGall, i Maigh Eo agus i gCiarraí ina measc.
Chomh maith leis an 22 láthair Ghaeltachta a ndearnadh tástáil orthu ó thaobh chaighdeán an uisce snámha, luaitear sa tuarascáil naoi dtrá eile sa nGaeltacht nach dtagann faoi na rialacha maidir le huisce snámha, péire i gCiarraí, ceann i gCorcaigh, trí cinn i nGaillimh agus trí cinn eile i Maigh Eo.
Thit caighdeán an uisce snámha ar Oileán Chléire ó chaighdeán den scoth go dtí caighdeán maith idir 2024 agus 2025. Bhí caighdeán den scoth uisce ar na tránna eile.
San iomlán, rinneadh tástáil ar 153 trá in Éirinn anuraidh, péire níos mó ná mar a bhí i dtuarascáil na bliana seo caite.
D’éirigh le 98% de na tránna an bunchaighdeán uisce (‘sásúil’) a bhaint amach. Bhain 120 acu (78%) an stádas ‘caighdeán den scoth’ amach, laghdú péire níos lú ná a bhí i dtuarascáil na bliana seo caite
Is í Folcadáin Dhún Laoghaire an t-aon láthair a ndearnadh tástáil uirthi nár bhain amach an bunchaighdeán uisce snámha. ‘Drochchaighdeán’ uisce a fuarthas in 2025 agus rabhadh tugtha ag an EPA don phobal gan dul ag snámh sna folcadáin in 2026 dá bharr. Deirtear gur sceitheadh fuíolluisce agus salachar madraí ba chúis le drochchaighdeán an uisce ansin.
Is féidir an t-eolas is déanaí maidir le caighdeán an uisce snámha agus aon rabhadh a fháil ag www.beaches.ie.
Tránna Gaeltachta a luaitear sa tuarascáil
| Ciarraí | |
|---|---|
| Fionntrá | Caighdeán den scoth |
| Baile an Sceilg | Caighdeán den scoth |
| Dún na nGall | |
| Baile Thiarnáin | Caighdeán den scoth |
| An Charraig Fhinn | Caighdeán den scoth |
| Na Dúnaibh | Caighdeán den scoth |
| Droim na Tine | Caighdeán den scoth |
| Trá Phort Arthur | Caighdeán maith |
| Dumhaigh | Caighdeán den scoth |
| Machaire Rabhartaigh | Caighdeán den scoth |
| Gaillimh | |
| Trá na bhForbacha | Caighdeán maith |
| Trá na mBan, An Spidéal | Caighdeán maith |
| Céibh an Spidéil | Caighdeán den scoth |
| An Trá Mhór, Coill Rua | Caighdeán den scoth |
| Trá an Dóilín, An Cheathrú Rua | Caighdeán den scoth |
| Trá Chaladh Fhínse | Caighdeán den scoth |
| Cill Mhuirbhigh, Inis Mór | Caighdeán den scoth |
| Trá Inis Oírr | Caighdeán den scoth |
| Maigh Eo | |
| Dumha Éige, Acaill | Caighdeán den scoth |
| Cuan Oilí | Caighdeán den scoth |
| An Mallach Rua | Caighdeán den scoth |
| Barr na Rinne | Caighdeán den scoth |
| Linn Taoide Bhéal an Mhuirthead | Gan rangú |
| Tránna eile | |
| Béal Bán (Ciarraí) | Caighdeán den scoth |
| An Rinn Rua (Ciarraí) | Caighdeán den scoth |
| Trá na gCaorach, Inis Oírr (Gaillimh) | Caighdeán den scoth |
| An Trá Mhór, Garmna (Gaillimh) | Caighdeán den scoth |
| Trá na Reilige, An Cheathrú Rua (Gaillimh) | Caighdeán den scoth |
| An Chrois, Iorras (Maigh Eo) | Caighdeán den scoth |
| An Tearmann, Iorras (Maigh Eo) | Caighdeán den scoth |
| An tSraith, Iorras (Maigh Eo) | Caighdeán den scoth |
| Oileán Chléire (Corcaigh) | Caighdeán maith |
Fág freagra ar 'Caighdeán maith uisce ag gach trá Ghaeltachta de réir tuarascála nua de chuid an EPA'