‘Beannacht an Taoisigh’ faighte do chur chuige Joe McHugh maidir le reachtaíocht teanga

Dheimhnigh an Roinn Ealaíon, Oidhreachta agus Gaeltachta le Tuairisc.ie inniu go bhfuil ‘beannacht an Taoisigh’ faighte ag an gcur chuige a d’fhógair Joe McHugh chun ‘tionscnamh polasaí’ a fhorbairt a d’fhoilseofaí in éineacht le reachtaíocht teanga in áit dul ar aghaidh le foilsiú an Bhille leasaithe i dtaobh Acht na dTeangacha Oifigiúla.

Mar a tuairiscíodh ar Nuacht TG4 níos túisce i mbliana, scríobh an tAire McHugh chuig an Taoiseach ag iarraidh a bheannacht a fháil chun tús a chur leis an tionscnamh polasaí.

Tuairiscíodh ag an am fresin gur scríobh an tAire Stáit chuig Airí éagsúla Rialtais “chun dul i mbun plé leo” maidir le conas is féidir “seirbhísí i nGaeilge sa Ghaeltacht a fheabhsú”.

Eisíodh na litreacha sin ón Aire Stáit ar an 7 Iúil agus dúirt urlabhraí de chuid na Roinne Gaeltachta le Tuairisc.ie inné go bhfuil plé ar siúl ag “leibhéal oifigeach maidir le hábhar na litreacha”.

I measc na n-aidhmeanna atá ag an Aire Stáit, ba mhaith leis go méadófaí céatadán na ndaoine le Gaeilge ar ‘phainéil earcaíochta’ sa státseirbhís ó 6%, mar atá geallta faoi láthair, go 10% mar thús agus go 20% amach anseo.

Ní fios cén fhad a mhairfidh an plé leis na hAirí agus na ranna eile faoi mholtaí an Aire Stáit maidir le feabhas a chur ar sholáthar seirbhísí i nGaeilge sa Ghaeltacht ná cén uair a fhoilseofar an leasú ar Acht na dTeangacha Oifigiúla.