An Taoiseach ag triall ar an Teach Bán chun bualadh le Trump

Beidh cruinniú ag an Taoiseach Micheál Martin agus Uachtarán na Stát Aontaithe, Donald Trump, inniu sa Teach Bán.

Meastar go mbeidh ar an Taoiseach láimhseáil chúramach a dhéanamh ar an gcruinniú le Trump, a bhfuil cáil an iompair ghuagaigh air.

Dúirt Micheál Martin gurb é an rud is mó a theastaíonn uaidh féin ó chruinniú traidisiúnta seo na Féile Pádraig ná caidreamh eacnamaíochta na tíre seo leis na Stáit Aontaithe a “dhaingniú”.

Tá ráite ag an Taoiseach go ndéarfaidh sé leis an Uachtarán Trump go ndéantar an infheistíocht “an dá bhealach” idir Éirinn agus na Stáit Aontaithe.

Tá sé ina imní go dtarraingeoidh Trump anuas an neamhchothroime atá sa trádáil idir Éirinn agus na Stáit Aontaithe ag cruinniú an lae inniu.

Deireadh Fómhair seo caite, thagair rúnaí trádála na Stát Aontaithe, Howard Lutnick, don trádáil sin agus dúirt gur “amaidí é go mbeadh barrachas trádála ag Éirinn agus muidne thíos leis”.

Tá faitíos ar dhaoine sa tír seo go bhféadfadh polasaí cosantaíoch an Uachtaráin Trump ó thaobh taraifí an-dochar a dhéanamh do gheilleagar na tíre seo, geilleagar atá ag brath go mór ar infheistíocht sheanbhunaithe chomhlachtaí ilnáisiúnta as na Stáit Aontaithe.

Sa gcaint a rinne an Taoiseach ag an bhféile SXSW [an deisceart trín iardheisceart] i gcathair Austin in Texas, dúirt sé gurb é an “príomhphointe” a dhéanfadh sé agus é ag caint le Donald Trump go dtéann an infheistíocht idir an dá thír “an dá bhealach”.

Agus é in Austin, d’fhreastail an Taoiseach ar Ghaeltacht “pop-up” ag Féile SXSW, mar a ndúirt sé gur chóir an bhéim a chur ar thaitneamh a bhaint as an nGaeilge agus ar fhrásaí a fhoghlaim seachas ar “chruinneas gramadaí”.

Meastar go bpléifidh an Taoiseach roinnt ceisteanna le hUachtarán na Stát Aontaithe, an Úcráin, an Meánoirthear agus Tuaisceart Éireann ar chuid díobh.

D’fhéadfadh go n-ardódh sé stádas dleathach do na mílte Éireannach atá ina gcónaí sna Stáit Aontaithe agus gan stádas dlí acu.

Bronnfaidh an Taoiseach an babhla traidisiúnta lán seamróige ar Uachtarán na Stát Aontaithe agus cuirfidh sé beannachtaí na Féile Pádraig mhuintir na tíre seo in iúl don Uachtarán agus do mhuintir na Stát Aontaithe.

Roimh an gcruinniú, dúirt Micheál Martin: “Is í an straitéis atá againne – beag beann ar an gcaint go léir – a léiriú go bhfuil seasamh buan láidir ag na Stáit Aontaithe in Éirinn agus gur caidreamh é sin atá an-láidir agus gur mian linn gur i neart a rachaidh sé sa todhchaí.”

“Caidreamh é a oibríonn an dá bhealach, sin é an pointe is mó a bheidh mé a dhéanamh.”

Mhol sé do chomhlachtaí a bhfuil infheistíochtaí acu in Éirinn gan “gníomhú róthobann” de bharr bagairt an Uachtaráin Trump taraifí 25% a chur ar iompórtálacha ón Aontas Eorpach.

“Ná cailligí misneach, seo tréimhse a gcaithfimid ár mbealach a dhéanamh tríd,” a dúirt sé.

Dúirt an Taoiseach go raibh go leor infheistíochta as Éirinn i Meiriceá agus go raibh comhlachtaí de chuid na tíre seo a raibh borradh fúthu lonnaithe sna Stáit Aontaithe. Dúirt sé chomh maith gur “bunáit chumhachtach” atá sa tír seo do chomhlachtaí de chuid na Stát Aontaithe le teacht a fháil ar an Margadh Eorpach Aonair.

“Téann an rochtain sin chun tairbhe don dá thír mar tá margadh Eorpach aimsithe ag comhlachtaí Meiriceánacha agus tá a gceanncheathrú in Éirinn an-tábhachtach leis an deis a thabhairt dóibh an margadh sin a ghnóthú.”