Tá 17 duine eile a bhí buailte ag an gcoróinvíreas básaithe in Éirinn.
193 duine atá básaithe in Éirinn go dtí seo ó thosaigh an ráig, 137 ó dheas den teorainn agus 56 ó thuaidh di.
Deimhníodh níos túisce inniu go raibh ochtar eile básaithe sa Tuaisceart.
331 cás nua a deimhníodh ó dheas tráthnóna.
5,602 cás atá deimhnithe in Éirinn, 4,604 cás ó dheas agus 998 cás ó thuaidh.
Maidir leis an seachtar déag is déanaí a bhásaigh ceathrar bean agus triúr fear déag a bhí i gceist. San oirthear a bhí cúigear déag de na daoine a bhásaigh, bhí duine amháin agus in iarthar na tíre a bhí an duine eile. 77 an mheánaois a bhí acu agus bhí fadhbanna sláinte eile ag cúigear déag acu.
Údar imní ar leith i gcónaí é scaipeadh an ghalair in ionaid altranais agus fógraíodh a thuilleadh beartas tráthnóna chun dul i ngleic leis an bhfadhb sin.
Dúirt Príomh-Oifigeach Leighis na Roinne Sláinte an Dr Tony Holohan gur mór an “spreagadh” an iarracht a bhí á déanamh ag muintir na hÉireann chun srian a chur le scaipeadh an víris, “Caithfimid coinneáil orainn leis an iarracht seo chun na daoine is leochailí sa tsochaí a chosaint agus an cuar a chothromú sa deireadh,” arsa an Dr Tony Holohan.
Tugadh le fios chomh maith tráthnóna go raibh laghdú suntasach tagtha ar an líon daoine eile a ndéanann othar le Covid-19 ionfhabhtú orthu.
8,034 tástáil atá déanta sa Tuaisceart. Maidir le cúrsaí tástála ó dheas, dúirt an Dr Tony Holohan tráthnóna inné go raibh i “bhfad níos mó” ná an 30,000 tástáil a tuairiscíodh cheana déanta.
Ar an 16 Márta tholgadh 4.3 duine eile an galar ó othar amháin ar an meán, ach faoi dheireadh na míosa seo caite ní raibh i gceist ach 2.5 duine eile d’othar amháin.
Dúirt an tAire Sláinte Simon Harris “nach n-éireodh leis an víreas maireachtáil sa phobal” dá laghdófaí an figiúir ó 2.5 go dtí faoi bhun 1.
Dúradh chomh maith go raibh líon na na ngartheagmhálaithe a bhíonn ag othar ar an meán laghdaithe ó 20 duine roinnt seachtainí ó shin go dtí triúr, comhartha eile go bhfuil na beartais ag obair, dar le lucht sláinte..
De réir an eolais is déanaí ón Roinn Sláinte ó dheas, eolas a bhain leis an 4,014 cás a bhí deimhnithe faoi mheán oíche Déardaoin seo caite:
- Fir a bhí i gceist le 48% de na cásanna agus mná iad 52%
- 206 braisle cásanna a bhí i gceist ar bhain 838 cás leo san iomlán
- An aois ar an meán a bhí ann i measc na n-othar ná 48 bliain d’aois
- Cuireadh cúram san ospidéal ar 1,118 duine, 28%
- As na daoine sin, cuireadh 158 duine in ICU, nó Aonad Dianchúraim
- Oibrithe sláinte a bhí i gceist le 1,084 cás, nó 27%
- I mBaile Átha Cliath a bhí an líon is mó cásanna le 2,251 cás, nó 56%, agus bhí Corcaigh sa dara háit, le 304 cás, nó 8%
- 105 cás a bhí i gcontae na Gaillimhe (2.6%), 84 a bhí i gcontae Chiarraí (2.1%), 80 cás a bhí i nDún na nGall (2%), 63 cás a bhí i Maigh Eo (1.6%), 43 cás a bhí i bPort Láirge (1.1%) agus 93 cás a bhí i gcontae na Mí (2.3%)
- Scaipeadh sa phobal ba chúis le 62% de chásanna, gartheagmháil le hothar eile ba chúis le 23% agus taisteal thar lear ba chúis le 15%
Fág freagra ar '17 duine eile básaithe ó dheas agus 331 cás nua deimhnithe'