Is cuma cé chomh hálainn is atá ár gcuid éadaigh agus ár smideadh, ní bheidh snas faiseanta ar dhuine mura bhfuil a gcuid fiacla glan agus sláintiúil. Tá an miongháire a bhíonn ar dhuine ar an gcéad rud a thugtar faoi deara i gcónaí. Ar ndóigh, tá tábhacht mhór le cuairteanna rialta ar an bhfiaclóir ach tá forbairtí nua teicneolaíochta ar fáil anois a chabhróidh le duine a gcuid féin a dhéanamh lena gcuid fiacla a choinneáil geal agus glan.
Tá trí cinn de tháirgí gurbh fhiú do dhuine triail a bhaint astu le líon na gcuairteanna ar an bhfiaclóir a laghdú ach gan dochar a dhéanamh do na fiacla.
Tá cuid de na táirgí seo sách daor faoi láthair agus cé go gceapaim gur infheistíocht mhaith a bheadh iontu, measaim go mbeidh siad níos saoire nuair a bheidh an teicneolaíocht nua atá i gceist iontu ar fáil níos coitianta.
1. Scuab fiacla leictreach Oral B Genius 9000
Deir lucht a dhéanta go bhfuil an deis seo cosúil le d’fhiaclóir féin a bheith agat sa mbaile! Is uirlis ‘chliste’ í seo mar go bhfuil teicneolaíocht i gceist inti a sheolann tuairisc trí Bluetooth chuig aip ar d’fhón póca le linn duit a bheith ag glanadh do chuid fiacla. Is cosúil go bhfágann 80% do dhaoine roinnt plaic ina ndiaidh ar a gcuid fiacla ach tugann an scuab fiacla leictreach seo eolas duit má tá aon chuid de do chuid fiacla ligthe i ndearmad agat. Tugann an scuab tuairisc duit freisin má tá an iomarca brú á chur agat ar do chuid fiacla nó ar do dhrandal. Tá costas €400 ó Boots uirthi ach measaim go laghdóidh an praghas sin in imeacht aimsire. Go deimhin, tá an scuab fiacla ceannann céanna le fáil ar Amazon ar £139.99.
2. Philips Sonicare AirFloss Power Flosser
Deir Philips go n-éireoidh leis an meaisín beag cumhachtach seo 99% níos mó plaic a bhaint de do chuid fiacla ná mar a dhéanfá le gnáthscuab aisti féin. Déantar uisce a scairdeadh faoi bhrú ón ngléas seo leis an oiread sin fuinnimh go nglanann sé aon rud atá i ngreim idir na fiacla, plaic agus bia san áireamh. Deirtear gur féidir leis an gcóras seo athrú suntasach a dhéanamh ar shláinte na bhfiacla tar éis coicíse. Ní thógann sé ach 30 soicind do bhéal iomlán a ghlanadh leis an gcóras agus fiú an té nach gcleachtainn úsáid rialta a bhaint as flas ar a gcuid fiacla bíonn siad an-tógtha leis an meaisín seo agus na torthaí a thugann sé. €73 an costas atá air.
3. Popwhite Whitening Primer
As Meiriceá a thagann an taos fiacla seo ar a bhfuil dath corcra! Cé go mbreathnaíonn sé aisteach ar dtús tá comhábhar ann le gealadh suntasach a dhéanamh ar do chuid fiacla. Baintear úsáid sa táirge seo as an gcoincheap ar a dtugtar ‘colour correcting’, atá coitianta go maith i gcás smididh agus seampú gruaige. Saineolaí smididh agus eolaí fiaclóireachta a d’oibrigh le chéile leis an taos fiacla seo a fhorbairt. Thar aon rud eile is ceart a rá nach bhfuil aon sárocsaíd sa táirge seo, rud a chiallaíonn go bhfuil sé an-sábháilte le húsáid. Thart ar €20 an costas atá air.
Fág freagra ar 'Fiacla geala glana ar phraghas níos réasúnta'