Carr a bhí sáinnithe ar Bhóthar Ché Dhún Chaoin tugtha as

Chuaigh carr ceangailte sna ballaí ar an dá thaobh de Bhóthar Ché Dhún Chaoin ag 9pm aréir agus bhí an tiománaí sáinnithe ina charr thar oíche

Carr a bhí sáinnithe ar Bhóthar Ché Dhún Chaoin tugtha as

Tá Cé Dhún Chaoin in Iarthar Duibhneach, a bhí dúnta ó mhaidin toisc tiománaí a bheith sáinnithe ina charr ar an mbóthar síos go dtí an ché, oscailte arís.

Tuairiscítear go ndeachaigh an carr ceangailte sna ballaí ar an dá thaobh den bhóthar casta cúng ó Bharr na hAille síos go dtí an ché timpeall 9pm aréir agus go raibh an tiománaí sáinnithe ina charr thar oíche.

Timpeall meán lae inniu, d’éirigh le tarracóir agus tochaltóir an carr a thabhairt anuas ón mbóthar.

Dúirt duine amháin a bhí ar an láthair gur chosúil go raibh an tiománaí, ar Éireannach é, ag súil go bhféadfadh sé dul ag campáil in aice leis an gcé ag bun an bhóthair. Tugadh an tiománaí slán ón gcarr ina raibh sé sáinnithe thar oíche níos túisce ar maidin agus tuairiscítear go bhfuil sé ag teacht chuige féin i ndiaidh na heachtra ach nach bhfuil sé gortaithe.

Cuireadh an tseirbhís farantóireachta ó Dhún Chaoin go dtí an Blascaod Mór ar ceal níos túisce inniu agus bhí slua mór turasóirí a raibh súil acu bád a fháil go dtí an Blascaod inniu ag fanacht ar An Móinteán ag barr Bhóthar Ché Dhún Chaoin ar feadh na maidine. Tá an tseirbhís ar fáil arís.

IMG_0258