Poileanta uachtarúil le hispíní agus anlann oinniún

Do mhias na seachtaine seo, tá poileanta uachtarúil ullmhaithe agam, in éineacht le hispíní agus anlann oinniúin. Is mias é poileanta agus ispíní a itear i go leor réigiún i dtuaisceart na hIodáile. Tá poileanta ina bhunbhia i dtuaisceart na hIodáile ó tháinig sé go dtí an Eoraip ó Mheiriceá san 16ú haois. Is cineál leite é polenta, a dhéantar trí ghráin arbhair thriomaithe a chócaráil i mbainne, i stoc nó in uisce.

Déarfainn, gurb é an poileanta le hispíní an leagan Iodálach de ‘bangers and mash’. Cuirfidh mé mo leagan pearsanta leis an mias seo, agus ag fanacht leis an téama céanna, cuirfidh mé anlann oinniún leis na hispíní. Cuirfidh mé casadh ar leith san anlann sin, áfach, trí chúpla spúnóg bheag de mhustard ‘violet’ a chur leis.

Is ceann de na rúin is lú aithne i gcócaireacht réigiúnach na Fraince é an mustard vialait (moutarde violette) seo.

Tagann sé ó iardheisceart na Fraince agus déantar é as síolta mustaird atá meilte go mín agus iad measctha le fíonchaora. Déanann a dhath vialait-donn, a ghéire shéimh agus a mhilseacht thorthúil é a idirdhealú ó chineálacha eile mustaird. Tugann an mustard seo blas fíor-Fhrancach, atá caolchúiseach, feiliúnach don mhias seo. Cuireann sé an méid ceart aigéadachta agus spíosraí leis chun cothromaíocht a chruthú in aghaidh shaibhreas na feola.

Cuireann a thréithe torthúla go breá leis an bhfeoil mhuice bhlasta agus leis na blastanais. Cuireann géire an mhustaird castacht leis an mhias, cuidíonn sí le saibhreas an bhia uilig a chothromú, agus cruthaíonn sé codarsnacht den scoth leis an bpoileanta atá níos séimhe.

Is maith liom i gcónaí go mbeadh mo chófra lán de chomhábhair spéisiúla agus de spíosraí ilbhlas. Tá mustard vialait ar cheann de na comhábhair sin. Is féidir le cúpla spúnóg bheag de rud chomh simplí leis an mustard vialait do dhinnéar a athrú ó bhonn agus a fheabhsú go mór. Athraíonn sé anlann simplí oinniún ina anlann suimiúil blasta. Is féidir an mustard vialait a cheannach i siopa bia ceardaíochta nó ar líne.

Is maith liom béile mar seo a chócaráil sa mbaile. Is mias í nach dteastaíonn mórán iarrachta uaithi agus ní thógann sé ach cúpla nóiméad í a chócaráil. Seo an cineál béile is maith liom a ullmhú nuair a bhíonn mé gann ar am. Ní bhíonn mórán glanadh le déanamh ina dhiaidh ach an oiread. Níl na comhábhair costasach ach bíonn an toradh an-bhlasta.

Tá béile do cheathrar san oideas seo.

MODH:

Téigh an t-oigheann roimh ré go 180°C.

Bain an craiceann de na hoinniúin agus gearr ina slisní iad.

Cócaráil na hoinniúin go mall i bhfriochtán leis an im agus beagán salainn go dtí go bhfuil siad go deas caramalaithe.

Cuir stoc mairteola leis agus lig dó laghdú.

Agus an stoc á laghdú, cuir na ispíní ar thráidire oighinn, blaistigh iad agus róst ar feadh thart ar 10-15 nóiméad iad, nó go sroicheann an teocht ina lár 75°C.

Nuair atá an stoc laghdaithe go dtí thart ar a leath, cuir an mustard vialait leis agus measc tríd.

Cuir an t-uisce, an bainne agus pinse mór salainn i sáspan, agus téigh go dtí go mbeidh sé ag suanbhruith go réidh.

Cuir an poileanta leis an leacht go mall, agus tú á mheascadh an t-am ar fad. Tá sé seo tábhachtach chun a chinntiú nach ndéanann sé cnapáin. Nuair a bheidh sé measctha go maith, laghdaigh an teas go dtí leibhéal íseal.

Measc go rialta é, agus déan cinnte go scríobann tú bun agus coirnéil an tsáspain. Tógfaidh sé 5–10 nóiméad poileanta a chócaráil.

Nuair a bheidh sé bog agus an poileanta mín, tóg den teas é. Measc an t-im agus an cháis Parmesan isteach ann go dtí go mbeidh an meascán uachtarúil. Cuir piobar dubh leis, agus blais é chun a fháil amach an bhfuil a dhóthain salainn ann.

Riar air láithreach. Tosaíonn an poileanta ag cruachan go tapa, mar sin mholfainn é a ithe gan mhoill.

Cuir an poileanta ar phláta agus cuir na hispíní agus an t-anlann oinniún anuas air.

Bainim mé féin sásamh as an mias seo le sailéad simplí de dhuilleoga measctha.

Bain taitneamh as!

Is cócaire gairmiúil é Stiofán Ó Féinne, cainteoir Gaeilge ó dhúchas as an Spidéal i gConamara. Bhain sé céim amach as clár cócaireachta Óstán an Savoy, Londain in 2019 agus tá sé ag obair faoi láthair in Daróg, i gcathair na Gaillimhe.