Mórimeachtaí faoi dhíon Fhéile Chois Fharraige curtha ar ceal

Tá cinneadh déanta ag Coiste Fhéile Choiste Fharraige mórimeachtaí faoi dhíon na féile a chur ar ceal.

I ráiteas a chuir lucht na féile amach tráthnóna dúradh gur ‘oth’ leo go raibh ócáidí a mbeadh “go leor daoine” ag freastal orthu curtha ar athló.

“De bharr srianta breise a bheith á bhfógairt ag an Rialtas agus de bharr imní sa bpobal faoi líon breise cásanna, beartaíodh go mbeadh sé stuama ócáidí a mbeadh go leor daoine i láthair acu a chur ar athló go dtí am a bheadh níos sábháilte.”

Tá an dá léiriú a bhí le bheith ar siúl i Seanscoil Sailearna, Le Cion ar Joe le hAisteoirí an Spidéil agus Coirm cheoil Cholmcille curtha ar ceal.

Leanfar, áfach, le “roinnt bheag imeachtaí faoi dhíon”, ina measc An Cosán Draíochta, a bheas á léiriú i Stiúideo Cuan den chéad uair anocht.

“Is oth leis an gCoiste gurbh éigean an cinneadh seo a ghlacadh ach níl tada níos tábhachtaí ná sábháilteacht an phobail agus in ainneoin go raibh sé i gceist i gcónaí go dteastódh teastas Covid le freastal ar imeachtaí, de bharr a thréine is atá scaipeadh an víris faoi láthair socraíodh gurbh é seo an bealach ab fhearr leis an bpobal a chosaint ar an mbaol reatha.

“Is mór ag an gCoiste an obair atá á déanamh ag neart daoine i gCois Fharraige le ócáidí a chur ar fáil agus a reáchtáil agus is mór acu freisin an tacaíocht a léiríodh go dtí seo don Fhéile.”

Tá súil ag lucht na féile na himeachtaí atá curtha ar athló a reáchtáil san Earrach.

Beidh an clár leasaithe le feiceáil ar www.coisfharraige.ie.