Mórchuid imeachtaí ag an bhFéile Bheag Filíochta atá le seoladh ar an mBuailtín anocht

Cuirfear tús leis an naoú Féile Bheag Filíochta sa Mhúsaem ar an mBuailtín i mBaile an Fheirtéaraigh, Corca Dhuibhne, tráthnóna inniu.

Ag a seacht a chlog tráthnóna a dhéanfar an Fhéile a sheoladh.

Mairfidh an Fhéile cúpla lá agus leanfar leis na himeachtaí as seo go dtí an Domhnach, idir léamhanna, cheardlanna, scannáin, seisiúin cheoil agus siúlóidí.

I mbliana beidh téama an scríbhneora dátheangaigh go mór sa treis agus is duine d’fhilí na háite, Dairena Ní Chinnéide – file dátheangach í féin – a osclóidh an Fhéile go hoifigiúil.

Tabharfaidh an Dochtúir Róisín Ní Ghairbhí léacht uaithi ar na scríbhneoirí dátheangacha Pádraig Mac Piarais agus Mícheál Ó hAirtnéide ina dhiaidh sin agus cuirfear clabhsúr ar an oíche oscailte le seoladh leabhar Bhríd Ní Mhóráin, Saothrú an Ghairdín, leabhar a sheolfaidh an craoltóir le RTÉ Raidió na Gaeltachta, Helen Ní Shé.

Beidh léamhanna agus ceardlanna filíochta ar siúl amárach, Dé Sathairn, i dteannta na bhfilí Theo Dorgan agus Mícheál Ó Ruairc. Ina ndiaidh sin, cuirfear tús le ceolchoirm na féile in Ionad an Bhlascaoid i nDún Chaoin, mar a mbeidh ‘Mo Pheann ag Rince’ faoi lánseol.

Is é atá i gceist leis an imeacht seo ná dánta le Seán Ó Ríordáin á léamh os ard agus iad á dtionlacan ag ceol. Is í Dairena Ní Chinnéide a léifidh na dánta agus ina dhiaidh sin, cloisfear Liam Ó Muirthile ag léamh roinnt sleachta as dialann an Ríordánaigh chomh maith. Cífear íomhánna áille de chuid an ealaíontóra Margaret Lonergan á teilgeadh sa chúlra an fhaid is a bheidh na léamha seo ar siúl.

Raghfar i mbun léitheoireachta arís maidin Domhnaigh i Sáipéilín na mBan Rialta sa Díseart i nDaingean Uí Chúis, agus cloisfear Deirdre Ní Ghrainbhéil ag seimint ar an gcruit lena linn.

Ag a seacht a chlog tráthnóna a dhéanfar an Fhéile a sheoladh

Is féidir a thuilleadh eolais a fháil mar gheall ar an bhFéile anseo.