Is maith liom an fear go bhfuil míleáiste anairde aige (dein do mhachnamh air)!
arsa Madonna, Banríon an Cheoil tráth, tamall de bhlianta ó shin nuair a bhí sí ‘mór’ leis an Lothario iomráiteach é fhéin, Warren Beatty, fear a bhí suas le bliain is fiche ní ba shine ná í ag an am.
Níor chuir sé aon mhairg uirthi féin ná a lucht leanta go raibh sí ag suirí le crunca cnagaosta ag an am. Fear breá dathúil gan aon cheist. Mná fiáin glan ina dhiaidh. Chomh mealltach le Casanova é fhéin an lá is fearr a bhí sé.
Ach anois go bhfuil Madonna ag déanamh isteach ar a bheith cnagaosta í fhéin, tá sí á fháil go dóite ó chigirí na meán sóisialta go bhfuil sé in am aici ciall a bheith aici.
Gan a bheith ag ligint uirthi go bhfuil sí óg fós. Gan a bheith ag déanamh na dtréan-iarrachtaí í fhėin a ‘bhreáthú’ le hinstealladh botox agus a leithéid. Gan a bheith…Gan a bheith …
Molta go haer a bhí Warren Beatty ag an aois atá Madonna anois, ceithre bliana is trí fichead.
Cáinte gan trócaire atá Madonna, go bhfuil sé de dhánaíocht inti fós í fhéin a chur i lár an aonaigh.
Deineadh sceanairt ar a cló is a cruth nuair a tháinig sí i láthair ag féile mhór na Grammys le fíordhéanaí.
Bhí sí ann chun duais mhór Grammy a bhronnadh air Kim Petras agus Sam Smith.
Seacht gcinn de na duaiseanna céanna, buaite aici féin ó thosnaigh sí amach dhá scór bliain ó shin.
Gach uile ceann acu tuillte aici. A cáil i bhfad is i ngearr. Saibhreas dá réir aici.
Maidir leis an gcáineadh a fuair sí ó ridirí na meán sóisialta, níor chuir Madonna,
bail uirthi, fiacail ann.
Aoiseachas agus fuath ban a bhí i gceist, a dhearbhaigh sí.
Cháin sí ‘Tionscal na Siamsaíochta’ as a bheith ag caitheamh anuas ar aon bhean go bhfuil sé de dhánaíocht inti a bheith i lár an aonaigh agus an ceathracha a cúig curtha di aici.
An ghráin dearg acu ar aon bhean atá misniúil, díograiseach, cróga, dar léi.
Níor chuireadar aon mhairg riamh orm, ar sí, ainneoin iad a bheith im cháineadh ón gcéad lá ar thosnaigh mé amach. Ní bhrisfidh siad mo spiorad anois. Beidh mé i gcónaí toilteanach agus mórtasach as a bheith im
lóchrann solais do mhná, is cuma cén aois iad.
Mo sheasamh ort, Madonna Louise Ciccone!
jpmorley0@gmail.com
‘Crúnca cnagaosta’?? Ar cheadmhach Madame Botox í féin nó mná scothaosta eile a aithisiú le focail den chineál sin freisin? Nó an ‘crúncaí’ iad na fearaibh amháin?