Éireannaigh, ionsaithe! Agus daoine gonta! Ag eachtrannach eile a tháinig thar tonnta!

Bhí Oireachtas na bliana seo thart nuair a tharla an scliúchas tar éis ionsaí ar pháistí scoile i mBaile Átha Cliath. Ní ar an ionsaí uafásach ach ar an rabharta bréagaisnéise agus fuatha a spreag círéibeacha agus clampar sa chathair ina dhiaidh a dhírítear na línte seo a leanas.  Is mar lúibín a cumadh iad, cé gur ar éigean a ghlacfadh roghnóirí an Oireachtais leo dá gcuirfí iarratas chomh lag faoina mbráid. Mar sin féin, ní beag é tábhacht an ábhair atá á phlé ann ag Elon agus Nole – ainmneacha a bhaineann leis an lúibín seo amháin. Má bhíonn trioblóid ag leathadh trí chathair eile amach anseo, an mbeidh bréaga agus bréagfhaisnéis,  mar atá faoi chaibidil acu faoi láthair, ag dul in olcas?

Lúbadh na fírinne…

ELON: A Thiarna ‘s a mhaighdean ar chuala tú an scéal, tá clampar sa chathair is caint air ó gach béal

NOLE: Inis dom tuilleadh, mar anois táim buartha, má deir tú go bhfuil scliúchas is raic mhór tuartha…

ELON: Deir Conor McGregor go bhfuil sé ina chogadh. Is gur chóir dúinn dúinn go léir anois bheith ag bogadh…

NOLE: Ach seachain, i dtosach tá faisnéis de dhíth seachas tuairim an trodaí a bhíonn ag caint ar gach ní

ELON: Éireannaigh, ionsaithe! Agus daoine gonta. Ag eachtrannach eile a tháinig thar tonnta!

NOLE: Ach cogar cén áit, cén fáth agus conas A rinneadh, más fíor, a leithéid de dhonas?

ELON: Breathnaigh ar X nó mar a thugtar air fós, Twitter, agus cuardaigh, is leor sin mar nós.

NOLE:Ní chuirim muinín i meán chomh falsaMás mian liom eolas, ní Twitter mo chall-sa.

ELON: Tá an scéal ag TikTok, ag Telegram is gréasáin eile Níl tuillte ag meáin eile ach tarcaisne agus seile.

NOLE: Ní ‘scéal’ amháin é faraor ach cuimse mhór scéalta Is an fhírinne mar a bheadh sí ceilte ag néalta.

ELON: Ná bac leis na sonraí, is léir an feall Murar léir duit é, is tú an breall.

NOLE: Nár dhúirt Gript cé a bhí freagrach, scéal a tharraing siad siar,Tar éis dóibh a admháil nach raibh a scéal fíor?

ELON: Rinne Gript botún ach ná déan dearmad Ar an uafás a tharla ar an droch-lá úd.

NOLE: Na saoithe ar líne, cad a mholann siad dúinn. Mar dhualgas dar leo atá anois fúinn.

ELON: Dáil Éireann a dhó agus a ceannairí ‘bheith crochta Gardaí a bhualadh is gach ‘tréatúir’ a nochtadh.

NOLE: Breith gan chúirt agus sárú gach dlí An leigheas dar leat ar gach uile ní.

ELON: Ní fiú bheith ag caint leat, ní tírghráthóir tú Ach duine le drochmheas ar do chine go dlúth.

NOLE: Ní ‘Go f… yourself’ a dúirt tú, ach ní fada go mbeidh Twitter (nó X) á bhrostú agat go deireadh a ré.

 Bréaga agus fuath ann á scaipeadh go tréan… Do ghléas go seasmhach chun donais a théann

ELON: Más mar sin a bheidh bíodh, ach is eol dom féin Ó cheannaíos é, táim cráite is i bpéin.

NOLE: Más amhlaidh atá, is léir dúinn an leigheas  Bíodh ciall agat, díol é, agus socraigh an praghas.