Cúrsa chun mná a mhealladh go dtí saol na craoltóireachta Gaeilge á reáchtáil ag Raidió Fáilte

Tá cúrsa oiliúna raidió saor in aisce do mhná ar spéis leo dul leis an gcraoltóireacht le reáchtáil ag Raidió Fáilte.

Tá sé fógartha ag an stáisiún raidió i mBéal Feirste go bhfuil ‘Cúrsa le Caoimhe’ le reáchtáil don cheathrú bliain i mbliana agus é i gceist na scileanna a bhaineann le clár raidió a chur le chéile a mhúineadh agus taithí a thabhairt do mhná ar chúrsaí craoltóireachta.

Is í an craoltóir Caoimhe Ní Chathail, a bhfuil cláir curtha i láthair aici do TG4,  RTÉ agus an BBC, a bheidh i mbun an chúrsa arís i mbliana.

Cúrsa ar líne a bheidh ann agus ranganna le reáchtáil gach Máirt idir an 30 Eanáir agus an 20 Feabhra. Cuirfidh na rannpháirtithe uile a gclár féin le chéile a chraolfar mar chuid de sceideal speisialta ar Raidió Fáilte  ar Lá Idirnáisiúnta na mBan ar an 8 Márta 2024.

“Tá mé ag dúil go mór traenáil raidió ar líne a chur ar fáil arís i mbliana do ghrúpa cumasach de mhná a bheidh ag cur tús lena n-aistear ar Raidió Fáilte, áit ar fhoghlaim mé féin cuid mhór mar chraoltóir,” a dúirt Caoimhe Ní Chathail. “Is iontach an deis í do mhná a gcláir raidió féin a chur le chéile do Lá Idirnáisiúnta na mBan i mbliana. Is pribhléid í domsa a bheith in ann tacú leo agus mo chuid a dhéanamh le cinntiú go bhfuil glórtha na mban le cloisteáil ar aerthonnta Raidió Fáilte.”

Deir Raidió Fáilte go bhfuil cuid de na mná a bhí páirteach sa chúrsa le blianta beaga anuas, ag obair sna meáin chumarsáide ar bhonn lánaimseartha nó ag craoladh le Raidió Fáilte agus stáisiúin raidió eile.

“Gach uair a bhí an cúrsa ar siúl go dtí seo bhí ró-éileamh ar spásanna agus táimid ag súil go mbeidh sé amhlaidh i mbliana,” arsa Dónall Mac Murchaidh, Oifigeach Léiriúcháin agus Traenála Raidió Fáilte.

Le háit a fháil ar an chúrsa gabh i dteagmháil le Dónall ar traenail@raidiofailte.com nó cuir glaoch ar 00 44 28 90 310013 roimh 5in ar an Aoine 26 Eanáir.