Cloch mhíle stairiúil ar bhóthar an Bhreatimeachta agus vóta caite ag móramh ar son mhargadh Johnson

Beidh an Bhreatain ag fágáil an AE ar an 31 Eanáir i ndiaidh do mhóramh mór vótáil ar son mhargadh imeachta Boris Johnson in Westminster tráthnóna.

Cloch mhíle stairiúil ar bhóthar an Bhreatimeachta ab ea vóta an lae inniu a chuir deireadh leis an tsáinn sa pharlaimint faoi thoradh an reifrinn trí bliana go leith ó shin inar vótáil móramh ar son an tAE a fhágáil.

Móramh mór 124 feisire a thug a mbeannacht do mhargadh Johnson. 358 a vótáil ar son an chomhaontaithe aistarraingthe a aontaíodh leis an AE agus 234 a bhí ina choinne.

Fágann sin go bhfuil an bealach réidh anois leis an reachtaíocht Bhreatimeachta a chur tríd an bparlaimint agus Teach na dTiarnaí ionas go mbeidh an Bhreatain in ann an tAE a fhágáil roimh dheireadh mhí Eanáir.

Faoin mbille ar glacadh leis inniu bheadh cosc ar aon síneadh ama eile a lorg ar an spriocam don idirthréimhse i ndiaidh an Bhreatimeachta, an 31 Nollaig 2020.

Dúirt Príomh-Aire na Breataine Boris Johnson inniu go raibh an Bhreatain “céim eile níos giorra don Bhreatimeacht a chur i gcrích”.

Dúirt ceannaire pháirtí an Lucht Oibre Jeremy Corbyn go leanfaí ag cur i gcoinne an phlean mar go raibh “bealach níos fearr agus níos cothroime” ann leis an AE a fhágáil.

Dúirt Boris Johnson gur anois an t-am éirí as an gcaint faoi ‘fág’ nó ‘fan’.

Dúirt Corbyn gur “náire shaolta náisiúnta” a bhí sa tslí ar dhéileáil rialtas na dTóraithe leis an mBreatimeacht ó 2016.

Ach a bhfágfaidh an Bhreatain an tAE ag deireadh mhí Eanáir, cuirfear tús leis na cainteanna casta iarBhreatimeachta faoi chúrsaí trádála agus eile.

Tá mórán den tuairim gur ar éigean go n-éireoidh leis an dá thaobh teacht ar réiteach faoi dheireadh 2020.