Ciao Bamboccioni…Mama is Papa sa tóir ar spás agus suaimhneas san Iodáil

Nach iontach na scéalta a thagann chugainn ón Iodáil leis uaireanta, i gcorplár an gheimhridh.

Cúis gháire ó Dhia chugainn ina theannta san, agus é ag teastáil go dóite na laethanta seo.

An bhféadfadh a leithéid a bheith i gceist in Éirinn, n’fheadar?

Máthair sna seachtóidí láir, ag dul i muinín cúirte chun a beirt mhac cnagaosta go maith a dhíshealbhú as an nead inar thóg sí iad.

Go hard sna daichidí atá an dá phlíoma breá seo.

Ag maireachtaint i gcathair Pavia i dtuaisceart na hIodáile atá siad. Le Mama.

Gan aon chuimhneamh acu beirt ar bhogadh amach as an dtigh, gan trácht ar cíos a íoc léi, ná cabhrú léi ar fuaid an tí, ainneoin an bheirt acu a bheith fostaithe go lánaimseartha.

Bamboccioni a thugtar ar a leithéid le seanbhlas san Iodáil. Leisceoirí leanbaí.

Patallóigíní a thabharfadh Éireannach orthu.

Patallóigíní cnagaosta anuas air sin.

San nuachtán La Provincia Pavese a bhí an cuntas seo.

D’aontaigh an breitheamh Simona Caterbi go raibh sé in am ag an dá liairne díomhaoin, dealramh a chur orthu féin, bogadh amach agus seasamh ar a gcosa féin.

Tá go dtí lár mhí na Nollag acu déanamh mar a ordaíodh dóibh.

Ní fios cén sórt Nollaig a bheidh ag an ‘dteaghlach’ seo, ach beidh suaimhneas agus spás ag Mama ina tigín féin ach go háirithe.

Cúpla bliain ó shin thóg Iodálach fir, cúig mbliana déag ar fhichead, cás i gcoinne a thuismitheoirí ar an mbonn ná féadfadh sé é fhéin a chothú ná a choimeád beo ar fiche míle euro sa mbliain. Ceoltóir páirt-aimseartha ab ea é, an créatúr.

Rialaigh an chúirt, ní nach ionadh, nach raibh aon dualgas ar thuismitheoirí cabhair ná cúnamh a thabhairt dá leithéid ag an aos ina raibh sé.

Beidh sé tamall eile ag seimint cheoil do phócaí folmha, an créatúirín.…

De réir fíricí a tháinig amach anuraidh san Iodáil tá suas le 70% de dhaoine idir 18 agus 34 ina gcónaí sa bhaile le Mama agus Papa. Fearaibh 72% fén gcéad díobhsan, mná 66%.

36.5% díobh atá ina mic léinn, 38% atá ‘amuigh’ ag obair agus 23.7% ‘ag lorg oibre’.

Níl figiúirí na hÉireann mórán níos fearr ná an Iodáil ainneoin ár saibhris.

68% d’Éireannaigh idir 25 agus 29 ag maireachtaint ag baile lena dtuismitheoirí.

Tá a fhios againn go léir cuid mhaith de na fáthanna atá leis seo, géarchéim tithíochta, agus nuair atá tigh nó árasán ar fáil, costas fíor-ard ar cheann a cheannach nó ceann a thógaint ar cíos.

Nuair a fhéachaimid ar ár gcomharsana Eorpacha eile, níl ach 4% de dhaoine fásta sa Danmhairg fós sa bhaile lena dtuismitheoirí, 5.7% sa bhFionlainn agus 6% sa tSualainn.

42% an meánfhigiúr san Eoraip go ginearálta.

Tá sé de cháil ar an dteaghlach Iodálach iad a bheith leanúnach ar a chéile. Gan é a bheith ina cliché ar fad, is breá leo comhluadar a chéile, is breá leo béiltí is cóisirí is teacht le chéile spleodracha.

Ach nuair a thagann liairní agus báirseacha i dtír ar pheataíocht Mhama is Papa…is léir go bhfuil teacht ag tuismitheoirí ar ‘an bhfocal sa chúirt’ nuair is gá.