Amárach sa Pharlaimint in Westminster pléifear éileamh an DUP go gcuirfí an Prótacal iarBhreatimeachta ar ceal. Ceadaíodh an díospóireacht mar fhreagra ar achainí an pháirtí a fuair tacaíocht ó 100,000 sínitheoir.
Bhí an díospóireacht Parlaiminte ar cheann de na cúig chéim i bhfeachtas an DUP chun stop a chur leis an teorainn i Muir Éireann. Tá súil acu go bhfaighidh siad dóthain tacaíochta ó fheisirí Caomhacha le brú a chur ar an bPríomh-Aire Boris Johnson an conradh idirnáisiúnta leis an Aontas Eorpach a shárú agus an Prótacal a chaitheamh i dtraipisí.
Maíonn an DUP gur in olcas a ghabhfaidh na fadhbanna trádála a eascraíonn as an bPrótacal nuair a bheidh deireadh leis na tréimhsí cairde. Méadóidh guagacht na nAontachtach dá réir a deir an páirtí mar go bhfuil beag is fiú déanta dá saoránacht de chuid na Ríochta Aontaithe.
I bhfianaise a bhfuil cloiste ó Michael Gove thar ceann na Breataine agus Maroš Šefčovič thar ceann an Aontais Eorpaigh is beag an t-údar dóchais ba cheart a bheith ag an DUP. Tá sé ráite agus athráite ag an mbeirt gur féidir cuid mhór de na fadhbanna a bhaineann leis an bPrótacal a fhuascailt. Bhí comhdháil ar líne ag an mbeirt Déardaoin le lucht gnó i dTuaisceart Éireann agus le ceannairí pobail, an tOrd Oráisteach san áireamh. Fuair gach dream éisteacht ach níor chualathas aon athrú poirt; gealladh mionleasuithe agus feidhmiú éifeachtach ach go bunúsach, ní chuirfí an Prótacal ar neamhní.
An gcloisfidh an DUP a mhalairt amárach? Tá cairde acu i gcónaí i measc an ERG, an dream a ndeachaigh siad i gcomhar leo chun bac a chur ar an mBreatimeacht measartha nó bog. Thairis sin, is deacair a rá; níor léir go dtí seo go raibh cumha ar Thóraithe ina ndiaidh. Níl an svae le feisirí an DUP a bhíodh nuair a bhí cóimheá na cumhachta acu. Rinne Boris Johnson feall orthu chomh luath géar is a bhí an deis aige ach, ós deacair a bheith cinnte an féidir brath ar a fhocal, cá bhfios cén freagra a bheidh aige ar an bhfeachtas seo.
Deirtear go bhfuil dea-chaidreamh ag Maroš Šefčovič agus Michael Gove lena chéile ach ní léir cén bhaint a bheidh ag Gove leis an scéal seo ó thus na míosa seo chugainn. Tá an Tiarna David Frost ceaptha ag an bPríomh-Aire chun a bheith i gceannas ar ghnóthaí leis an AE ó thús mhí an Mhárta. Tá suíochán tugtha do Frost ag bord an rialtais cé nach feisire Parlaiminte é: thuairisc an Financial Times gur chuir sé a chosa uaidh, ag éileamh na cumhachta chun an conradh a d’aontaigh sé mar idirbheartaí a fheidhmiú. Is cosúil go mbeidh an Tiarna Frost ag freagairt do Gove ach deirtear go bhfuil ardmheas ag Johnson air agus a dhoras ar leathadh roimhe.
An mbeidh éifeacht aige sin ar an bplé faoin bPrótacal? Maíodh abhus go mbeadh Frost báúil leis an DUP agus lena n-éileamh nach ndéanfaí idirdhealú idir muintir an Tuaiscirt agus saoránaigh sa Bhreatain Mhór. B’fhéidir é ach cuimhnímis gurb é Frost an t-idirbheartaí a d’aontaigh conradh an Bhreatimeachta. Bhí Gove báúil le freasúra an DUP do Chomhaontú Aoine an Chéasta fiche bliain ó shin ach bhí sé tiomanta (go dtí seo ar aon chuma) d’fheidhmiú an Phrótacail.
Ní rud fánach, gan tábhacht é freasúra na n-aontachtach don Phrótacal. Buille síceolaíoch is ea an deighilt, fíor nó samhlaithe, idir iad agus an chuid eile den Ríocht Aontaithe. Ceist idir iad féin agus Príomh-Aire na Breataine is ea é sin, iarmhairt an Bhreatimeachta chrua a raibh siad mar chrann taca aige. Dá gcuirfeadh an Bhreatain an Prótacal ar ceal, go haontaobhach, sháródh sé conradh an Bhreatimeachta, céim mhór a mbeadh ciallachais an-diúltach léi.
Beidh deis ag ochtar feisirí an DUP a racht a chur díobh san díospóireacht amárach. Ach beidh deis freisin ag beirt fheisirí an SDLP, Colum Eastwood agus Claire Hanna, agus Stephen Farry, Alliance a mheabhrú don Pharlaimint go raibh móramh i dTuaisceart Éireann in aghaidh an Bhreatimeachta agus gur mionlach iad an DUP abhus.
Cé leis an imirt anois?
Fág freagra ar 'An dtabharfar cluas éisteachta don DUP in Westminster?'